امریکہ کے صدر ڈونلڈ ٹرمپ نے کہا ہے کہ وہ ایران کے ساتھ صرف ایک مستقل اور دیرپا معاہدہ چاہتے ہیں۔
امریکی صدر نے فاکس نیوز کو فون پر دیے گئے ایک انٹرویو میں کہا: ’مجھے کبھی بھی حکومت کی تبدیلی میں زیادہ دلچسپی نہیں رہی۔ کچھ لوگ حکومت کی تبدیلی کی بات کرتے ہیں، لیکن آپ کو یہ بھی بتانا پڑتا ہے کہ اس کا مطلب کیا ہے۔‘
امریکی صدر کا کہنا تھا کہ ’میں اب تک دو حکومتوں کا خاتمہ کر چکا ہوں۔ گروپ ون اور گروپ ٹو۔ اب ہم گروپ تھری سے نمٹ رہے ہیں۔ اس لیے آپ اسے حتمی حکومت کی تبدیلی بھی کہہ سکتے ہیں۔‘
ٹرمپ نے کہا کہ تیسرے گروپ کا رویہ ’اتنا مختلف نہیں۔ شاید وہ زیادہ عقلمند ہیں، لیکن ان کے ساتھ کام کرنا بہت، بہت مشکل ہے۔ میرا مطلب ہے کہ ہم کوئی معاہدہ کرتے ہیں اور اگلے ہی دن وہ اسے توڑ دیتے ہیں۔‘
ان کا کہنا تھا کہ وہ ایران کے ساتھ ایسا معاہدہ کرنا چاہتے ہیں جو طویل عرصے تک برقرار رہے، ’تاکہ اگر چار، 15 یا 20 سال بعد کوئی نااہل صدر بھی آ جائے تو ایران جوہری ہتھیار حاصل نہ کر سکے۔‘
ایران اور امریکہ کے درمیان ممکنہ رابطوں اور ثالثی کی کوششوں کے حوالے سے قطر کی سفارتی سرگرمیاں ایک بار پھر توجہ کا مرکز بن گئی ہیں۔
امریکی نشریاتی ویب سائٹ ایگزیوس کے رپورٹر باراک راوید کے مطابق قطری ایلچی علی زوادی گذشتہ رات تہران پہنچے تھے، جہاں انھوں نے ایرانی حکام سے ملاقاتیں کیں۔ علی زوادی قطر کے ایک سینئر سفارت کار ہیں اور حکومت میں سٹریٹجک امور کے وزیر کے طور پر خدمات انجام دے رہے ہیں۔
ایرانی نائب وزیر خارجہ کاظم غریب آبادی نے صحافیوں سے گفتگو میں تصدیق کی کہ قطری وفد گذشتہ رات تہران میں موجود تھا۔ ان کے مطابق وفد نے تقریباً دو گھنٹے تک بات چیت کی، جس کے بعد وہ قطر واپس روانہ ہو گیا۔
اس سے قبل باراک راوید نے رپورٹ کیا تھا کہ امریکی صدر ڈونلڈ ٹرمپ کے ایلچی سٹیو وٹکوف اور جیرڈ کشنر نے جمعرات کو برلن میں قطری حکام سے ملاقات کی تھی۔ اسی دوران قطر کے امیر شیخ تمیم بن حمد آل ثانی نے جرمن چانسلر فریڈرک مرز اور صدر فرینک والٹر اشٹائن مائر کی میزبانی بھی کی۔
دوسری جانب ایرانی وزیر خارجہ عباس عراقچی سے آج اخبار ایران کو دیے گئے ایک انٹرویو میں قطر اور عمان کے ذریعے تہران اور واشنگٹن کے درمیان پیغامات کے تبادلے کے بارے میں سوال کیا گیا۔ جواب میں انھوں نے کہا کہ ایسا ضروری نہیں کہ قطر یا کسی دوسرے ملک سے ایران آنے والی ہر پرواز کسی مذاکراتی یا ثالثی مشن کا حصہ ہو۔
امریکہ کے صدر ڈونلڈ ٹرمپ نے کہا ہے کہ وہ ایران کے ساتھ صرف ایک مستقل اور دیرپا معاہدہ چاہتے ہیں۔...
Source: Admin