حماس غزہ کا انتظام فلسطینی ٹیکنوکریٹ کمیٹی کے حوالے کرنے پر آمادہ ہوگئی

فلسطینی مزاحمتی تنظیم حماس نے جنگ بندی معاہدے کے تحت غزہ کا انتظام ٹیکنوکریٹ کمیٹی کے حوالے کرنے پر آمادگی ظاہر کر دی۔ خبر رساں ادارے اے ایف پی کے مطابق حماس نے بتایا ہے کہ وہ غزہ کا کنٹرول فلسطینی ٹیکنو کریٹ کمیٹی (ماہرین پر مشتمل کمیٹی) کے سپرد کرنے کیلیے تیار ہے، تاہم اس کے ساتھ ہی یہ مطالبہ بھی کیا ہے کہ رفح بارڈر کراسنگ کو چند دنوں کے اندر مکمل طور پر دوبارہ کھولا جائے۔ حماس کے ترجمان حازم قاسم نے اے ایف پی سے گفتگو کرتے ہوئے کہا کہ پروٹوکول تیار ہیں، فائلیں مکمل ہیں اور اس منتقلی کی نگرانی کیلیے کمیٹیاں بھی تشکیل دی جا چکی ہیں تاکہ غزہ کی پٹی کے تمام شعبوں کا انتظام مکمل طور پر ٹیکنوکریٹ کمیٹی کو منتقل کیا جا سکے۔ حازم قاسم نے مزید کہا کہ غزہ اور مصر کے درمیان واقع رفح بارڈر کراسنگ کو دونوں طرف سے کھولا جانا چاہیے تاکہ غزہ کی پٹی میں داخلے اور وہاں سے نکلنے کی مکمل آزادی ہو اور اس میں اسرائیل کی جانب سے کوئی رکاوٹ نہ ہو۔

Source: Social Media