غزہ کی پٹی میں جاری ناکہ بندی اور اسرائیلی جنگ کے درمیان غذائی قلت اور شیرخوار فارمولے کی کمی کے باعث دو شیر خوار بچے موت کا شکار ہوگئے۔ طبی ذرائع کے مطابق غزہ کی پٹی میں خوراک اور ادویات کی قلت سے مرنے والوں کی تعداد 244 ہو گئی ہے۔ اسرائیلی طیاروں کی جانب سے جنوبی غزہ کی پٹی میں خان یونس کے مغرب میں واقع المواصی میں بے گھر افراد کے ٹینٹ ہاؤس پر بمباری سے دو شہری جاں بحق اور دیگر زخمی ہو گئے۔ اسرائیلی توپ خانے نے غزہ شہر کے مشرق میں واقع شجاعیہ اور التفاح محلوں پر بھی گولہ باری کی۔ اسرائیلی فوج نے علاقے میں گھروں اور عمارتوں کے خلاف بڑے پیمانے پر مسماری کی کارروائیاں بھی کی ہیں۔ غزہ کی پٹی کے شمال میں جبالیا کے مشرق میں بوبی ٹریپڈ روبوٹ کو دھماکے سے اڑا دیا۔ دریں اثنا اسرائیلی ڈرون نے خان یونس کے مشرق میں واقع قصبے بنی سہیلہ میں شہریوں کے ایک گروپ کو نشانہ بنایا جس کے نتیجے میں دو شہری ہلاک اور متعدد زخمی ہوگئے۔ جمعرات کو غزہ میں اسرائیلی فوج نے اپنی وحشیانہ کارروائیوں میں 70 فلسطینیوں کو قتل کردیا۔ مرنے والوں میں زیادہ تر بچے اور خواتین شامل ہیں۔ سیاسی محاذ پر امریکی صدر ڈونلڈ ٹرمپ اور ان کے وزیر خارجہ مارکو روبیو نے جمعرات کو اسرائیلی وزیر اعظم بنجمن نیتن یاہو اور اسرائیل کے اسٹریٹجک امور کے وزیر رون ڈرمر کے ساتھ ٹیلی فون پر بات چیت کی۔ اسرائیلی پریس رپورٹس کے مطابق غزہ کی پٹی میں جنگ کو "دو ہفتوں میں" ختم کرنے کے لیے مفاہمت طے پا گئی ہے۔ اخبار "اسرائیل ہیوم" نے اطلاع دی ہے کہ معاہدے میں حماس کے زیر حراست یرغمالیوں کی رہائی اور تحریک کے بقیہ رہنماؤں کی دوسرے ممالک میں منتقلی شامل ہے۔ اس کا مقصد خطے میں جاری کشیدگی کو کم کرنا ہے۔ اخبار کے مطابق معاہدے میں یہ بھی طے کیا گیا تھا کہ "اسرائیل کی دو ریاستی حل پر مبنی فلسطینی-اسرائیل تنازع کے مستقبل کے حل پر غور کرنے کی خواہش ہے بشرطیکہ فلسطینی اتھارٹی کے اندر اصلاحات کی جائیں۔ مجوزہ معاہدے کے مطابق امریکہ مقبوضہ مغربی کنارے کے علاقوں پر کچھ اسرائیلی خودمختاری کے اطلاق کو تسلیم کرے گا۔ وسیع تر مفاہمت کے حصے کے طور پر ابراہیم معاہدے میں اضافی ممالک کو بھی شامل کرنے کی کوشش کی جائے گی۔ امریکی حکام نے جمعرات کو کہا کہ قیدیوں کے تبادلے کے مذاکرات میں پیش رفت حاصل کرنے کے لیے اہم کوششیں کی جا رہی ہیں۔ ایران پر حملے کے بعد اس حوالے سے پیش رفت کی رفتار میں نمایاں تیزی آئی ہے۔

Source: social media