غیر قانونی تارکین امریکا آکر مشکلات پیدا کرتے ہیں، ٹرمپ

امریکی صدر ٹرمپ نے کہا ہے کہ غیر قانونی تارکین امریکا آکر مشکلات پیدا کرتے ہیں۔ افغان شہری کی فائرنگ سے زخمی خاتون نیشنل گارڈ دم توڑ گئی۔ غیرملکی میڈیا کے مطابق ڈونلڈ ٹرمپ نے کہا کہ حکام سے غیرقانونی تارکین وطن سے متعلق تفصیلی بات کی ہے۔ انہوں نے کہا کہ ہمارے سیکیورٹی اہلکار ملک کی خدمت کررہے ہیں۔ ڈونلڈ ٹرمپ نے بتایا کہ گزشتہ روز واقعہ میں زخمی ہونے والی خاتون نیشنل گارڈ اہلکار دم توڑ گئی ہے جبکہ دوسرے اہلکار کی حالت تشویشناک ہے۔ انہوں نےحملے کے بعد دم توڑنے والی نیشنل گارڈ خاتون اہلکار کے حوالے سے بتایا کہ 20 سالہ سارہ بیک اسٹروم کو گھات لگا کر ایک افغان شہری نے نشانہ بنایا تھا، جبکہ اسی واقعے میں اس کے ساتھ زخمی ہونے والا نیشنل گارڈ اہلکار 24 سالہ اینڈریو وولف اس وقت اپنی زندگی کی جنگ لڑ رہا ہے۔ ڈونلڈ ٹرمپ نے کہا کہ یہ حملہ ایسے وقت میں ہوا ہے جس وقت بائیڈن دور میں امیگریشن جانچ میں خامیاں سامنے آگئی ہیں۔ امریکی صدر کا کہنا تھا کہ امریکا کے پاس دنیا کی بہترین فوج اور دفاعی آلات ہیں اور وینزویلا کو حد میں رکھنے کے لیے جلد اقدامات شروع کریں گے۔ ٹرمپ نے مزید کہا کہ امریکا کے پاس دنیا کی مضبوط فوج اور دفاعی آلات ہیں، امریکا کے بی 2 طیاروں نے 37 گھنٹے پرواز کی اور ہدف کو نشانہ بنایا، بی 2 طیاروں کے پائلٹس سے ملاقات کی یہ پائلٹس ٹام کروز کی طرح تھے۔ واضح رہے کہ گزشتہ روز واشنگٹن میں وائٹ ہاؤس کے قریب نیشنل گارڈ کے 2 اہلکاروں پر فائرنگ کی گئی تھی، فائرنگ کے بعد ایک مشتبہ شخص رحمان اللّٰہ کو حراست میں لیا گیا۔

Source: social media