فرانسیسی صدر میکرون چین میں جاگنگ پر نکل پڑے، ویڈیو وائرل

فرانسیسی صدر ایمانویل میکرون کی چین میں جاگنگ پر جانے کی ویڈیو سوشل میڈیا پر وائرل ہوگئی۔ غیرملکی خبررساں ادارے کی رپورٹ کے مطابق مشہور جن چنگ لیئک پارک میں میکرون کو اپنے سیکیورٹی گارڈ کے ساتھ دوڑتے ہوئے دیکھا گیا۔ میکرون نے سیچوان یونیورسٹی میں طلبا کے ساتھ ٹیبل ٹینس میں بھی خوب مہارت دکھائی۔خاتون اول بریجیت میکرون بھی پانڈا سینٹر پہنچ گئیں، مشہور زمانہ پانڈا یوان منگ کی اٹکھیلیوں سے لطف اندوز ہوئیں۔ علاوہ ازیں چینی صدر شی جن پھنگ نے بیجنگ کے عظیم عوامی ہال میں سرکاری دورے پر چین آئے ہوئے فرانسیسی صدر ایمانوئل میکرون سے بات چیت کی۔ شی جن پھنگ نے کہا کہ چین فرانس کے ساتھ مل کر دونوں ممالک کے عوام کے بنیادی مفادات اور عالمی برادری کے دیرپا مفادات کو مد نظر رکھتے ہوئے مساوی مکالمے اور کھلے تعاون پر قائم رہنے کا خواہاں ہے، تاکہ چین-فرانس جامع اسٹریٹجک شراکت داری کو مزید مستحکم اور بہتر بنایا جائے، اور مساوی اور منظم عالمی کثیرالقطبی اور جامع اقتصادی عالمگیریت کی ترقی میں نئی خدمات سرانجام دی جائیں۔ میکرون نے کہا کہ فرانس چین کے ساتھ تعلقات کو اہمیت دیتا ہے، ایک چین کی پالیسی پر قائم ہے، اور فرانس-چین جامع اسٹریٹجک شراکت داری کو مسلسل گہرا کرنے کا خواہاں ہے۔ فرانس یورپ-چین تعلقات کی صحت مند اور مستحکم ترقی کو فروغ دینے کی کوشش کرے گا۔ ملاقات کے بعد، دونوں سربراہان نے جوہری توانائی، زراعت و خوراک، تعلیم، اور ماحولیاتی تحفظ کے شعبوں میں تعاون کی متعدد دستاویزات پر دستخط کی تقریب میں شرکت کی۔

Source: social media