فرانس، ڈنمارک اور گرین لینڈ۔۔ آرکٹک خطے میں دفاع مضبوط کرنے کا اعلان

فرانس کے صدر میکرون نے آرکٹک خطے میں دفاع مضبوط کرنے کی حمایت کا اعلان کیا ہے۔ بین الاقوامی میڈیا رپورٹس کے مطابق فرانسیسی صدر میکرون سے ڈنمارک اور گرین لینڈ کے وزرائےاعظم نے ملاقات کی جس میں روس کی جارحانہ پوزیشن اور چین کے بڑھتے معاشی اثرورسوخ پر تشویش کا اظہار کیا گیا۔ پریس کانفرنس میں صدر میکرون نے آرکٹک خطے میں دفاع مضبوط کرنے کی حمایت کا اعلان کرتے ہوئے کہا کہ یورپ کو قطب شمالی میں اپنی سلامتی مزید مستحکم کرنا ہو گی۔ ان کا کہنا تھا کہ فرانس مشترکہ یورپی فوجی مشقوں کی حمایت کرتا ہے اور فرانس نیٹو کی نگرانی اور سرگرمیوں میں اضافے کی بھی حمایت کرتا ہے۔ ڈنمارک اور گرین لینڈ کی قیادت نے زور دیا کہ بدلتے عالمی حالات میں متحد اور خودمختار یورپ ناگزیر ہے۔ دوسری جانب سربراہ یورپی یونین خارجہ پالیسی کاجا لاس نے کہا ہے کہ یورپ اب امریکا کی ترجیح نہیں رہا اس لیے اپنی بقا کی جنگ خود لڑنا ہو گی۔ برسلز میں گفتگو کرتے ہوئے کاجا کالاس نے کہا کہ امریکا کے ساتھ تعلقات میں تبدیلی عارضی نہیں بلکہ مستقل ہے تاریخ میں وہ طاقت زندہ نہیں رہی جس نے سلامتی دوسروں پر چھوڑی۔ کاجا کالاس نے کہا کہ نیٹو کو اپنی طاقت برقرار رکھنے کےلیے مزید یورپی بننا ہو گا طاقت کے ذریعے دنیا کو کنٹرول کرنے کے خطرات حقیقی ہیں، امریکا اتحادی رہے گا مگر یورپ کو دفاعی حکمت عملی خود بنانا ہو گی۔

Source: social media