National

جعلی پاسپورٹ کیس: سی بی آئی عدالت نے چھوٹا راجن کو قصوروار قرار دے کر سات سال قید کی سزا سنائی

30/07/26

چنئی، 30 جولائی (: چنئی کی ایک سی بی آئی عدالت نے جمعرات کو انڈرورلڈ ڈان چھوٹا راجن کو 2002 کے جعلی پاسپورٹ کیس میں قصوروار قرار دیتے ہوئے سات سال قید کی سزا سنائی۔ عدالت نے چھوٹا راجن عرف وجیا کدم عرف راجندر عرف نانا کو دھوکہ دہی، جعلسازی، فرضی شناخت اختیار کر کے فراڈ کرنے اور جان بوجھ کر جعلی دستاویزات جمع کرا کے پاسپورٹ حاصل کرنے کے جرائم میں مجرم قرار دیتے ہوئے 55 ہزار روپے جرمانہ بھی عائد کیا۔ قصوروار چھوٹا راجن اس وقت نئی دہلی کی انتہائی سکیورٹی والی تہاڑ جیل میں عمر قید کی سزا کاٹ رہا ہے ۔ سی بی آئی نے 19 مارچ 2002 کو چھوٹا راجن کے خلاف مقدمہ درج کیا تھا۔ الزام تھا کہ اس نے جعلی دستاویزات جمع کرا کے دھوکہ دہی سے پاسپورٹ حاصل کیا اور چنئی کے علاقائی پاسپورٹ دفتر کو فریب دیا۔ تحقیقات میں معلوم ہوا کہ چھوٹا راجن نے وجیا کدم کے نام سے ہندوستانی پاسپورٹ کے لیے درخواست دی تھی اور اس مقصد کے لیے اسکول کا ٹرانسفر سرٹیفکیٹ، راشن کارڈ، ڈیمانڈ ڈرافٹ (ڈی ڈی) اور دیگر جعلی دستاویزات جمع کرائے تھے ۔ تحقیقات سے یہ بھی انکشاف ہوا کہ وجیا کدم کا اصل نام راجندر عرف نانا عرف چھوٹا راجن ہے ، جو سداشیو کا بیٹا اور ممبئی کا رہائشی ہے ۔ سی بی آئی کے مطابق چھوٹا راجن نے خود کو "وجیا کدم" ظاہر کرتے ہوئے عمر اور رہائش کے ثبوت کے لیے جعلی دستاویزات جمع کرائیں اور انہی کی بنیاد پر چنئی کے علاقائی پاسپورٹ دفتر سے دھوکہ دہی کے ذریعے پاسپورٹ حاصل کیا، جسے بعد میں اصل دستاویز کے طور پر استعمال بھی کیا۔ تحقیقات مکمل ہونے کے بعد سی بی آئی نے 22 جنوری 2004 کو عدالت میں چارج شیٹ داخل کی۔ مقدمے کی سماعت مکمل ہونے کے بعد عدالت نے اسے قصوروار قرار دیتے ہوئے مذکورہ سزا سنائی۔

Source: Admin