مئوگنج، بھوپال، 10 اکتوبر:مدھیہ پردیش بھارتیہ جنتا پارٹی کے ایم ایل اے پردیپ پٹیل کا ایک ویڈیو سوشل میڈیا پر وائرل ہو رہا ہے، جس میں ایم ایل اے ضلع کے ایک سینئر پولیس افسر کے سامنے سجدہ ریز ہوتے نظر آ رہے ہیں۔ اس کے ساتھ ہی ایم ایل اے مسٹر پٹیل کی طرف سے ریوا پولیس کے انسپکٹر جنرل کو لکھے گئے خط کی کاپی بھی سوشل میڈیا پر وائرل ہو رہی ہے، جس میں انہوں نے اپنے ضلع مئوگنج کوغیر قانونی منشیات کی گرفت میں ہونے کی کہی ہے۔ خط میں الزام لگایا گیا ہے کہ ان کے اسمبلی حلقہ کے ہر گاؤں میں غیر قانونی نشہ آور اشیاء فروخت ہو رہی ہیں اور اس معاملے میں موثر پولیس کارروائی نہ ہونے کی وجہ سے جرائم میں بھی مسلسل اضافہ ہو رہا ہے۔ انہوں نے الزام لگایا ہے کہ مجرموں کو پولیس کا کوئی خوف نہیں ہے اور وہ پولیس پر جان لیوا حملے بھی کر رہے ہیں۔ انہوں نے خط میں درخواست کی ہے کہ پولیس منشیات کے کاروبار میں ملوث افراد اور انہیں تحفظ فراہم کرنے والوں کے خلاف موثر کارروائی کرے۔ اس کے ساتھ ہی وائرل ویڈیو میں مسٹر پٹیل سینئر پولیس افسر ایڈیشنل سپرنٹنڈنٹ آف پولیس (اے ایس پی) انوراگ پانڈے کے سامنے سجدہ ریز ہورہے ہیں۔ اس پر پولیس افسر ان سے ان کا مسئلہ پوچھ رہے ہیں، جس پر مسٹر پٹیل یہ کہتے ہوئے سنے جارہے ہیں کہ مسئلہ کچھ نہیں ہے، آپ غنڈوں سے مجھے مروانا چاہتے ہیں۔ اس دوران بی جے پی کے سینئر ایم ایل اے اجے وشنوئی بھی ایم ایل اے مسٹرپٹیل کی حمایت میں سامنے آگئے ہیں۔ مسٹر بشنوئی نے ایکس پر مسٹر پٹیل کے اس ویڈیو اور اس سے متعلق خبر کو پوسٹ کرتے ہوئے لکھا، "پردیپ جی، آپ نے صحیح مسئلہ اٹھایا ہے، لیکن کیا کریں، پوری حکومت ہی شراب کے ٹھیکیداروں کے سامنے سجدہ ریز ہے۔"

Source: uni news