برطانوی اخبار نے مودی نواز شیخ حسینہ کے آمرانہ دور سے متعلق دستاویزی فلم جاری کر دی

عالمی جریدے فنانشل ٹائمز نے بنگلا دیش کی سابق وزیراعظم اور مودی نواز رہنما شیخ حسینہ کے آمرانہ دور پر مبنی ایک دستاویزی فلم جاری کردی۔ بنگلہ دیش کے مقامی اور عالمی ماہرین کی تحقیقات کی مدد سے شیخ حسینہ کی بدعنوانی کا پردہ فاش ہوگیا، طلبہ تحریک کی کوآرڈینیٹر رافیہ رحنوما حریدی نے کہا کہ شیخ حسینہ کا دور ایک جمہوری دور نہیں تھا۔ جنوبی ایشیا کے بیورو چیف آف فنانشل ٹائمز جان ریڈ کے مطابق، شیخ حسینہ کے خلاف طلبا کی احتجاجی تحریک نوکریوں کے کوٹے میں کرپشن اور ان کے آمرانہ رویے کے باعث اپنے عروج پر پہنچی، بنگلا دیش میں بدعنوانی کی وسعت ایسی تھی جو انہوں نے دنیا کے کسی اور ملک میں نہیں دیکھی۔ جان ریڈی نے کہا کہ سابق حکومت کے قریبی افراد نے بنگلہ دیشی فوجی انٹیلی جنس ایجنسی کی مدد سے بینکوں پر کنٹرول حاصل کیا، اس کے علاوہ ’’اسٹوڈنٹس اگینسٹ ڈسکرمنیشن‘‘ کے کوآرڈی نیٹر رضوان احمد رفعت نے الزام عائد کیا کہ پولیس اور حکمران جماعت کے مسلح غنڈوں نے مظاہرین پر براہِ راست فائرنگ کی، اسنائپر شاٹس استعمال کیے اور ہیلی کاپٹروں سے شیلنگ تک کی۔ فنانشل ٹائمز کی رپورٹ کے مطابق احتجاج کے دوران 1400 افراد ہلاک، ہزاروں لاپتہ اور زخمی ہوئے، ایس عالم گروپ نے بنگلہ دیش سے 10 ارب ڈالر سے زائد سرمایہ بیرون ملک منتقل کیا۔ فنانشل ٹائمز کے ایک اور رپورٹر رافع الدین نے کہا کہ بنگلہ دیش سے چرایا گیا بڑا سرمایہ برطانیہ میں جائیدادوں میں لگا، شیخ حسینہ اور شیخ ریحانہ سمیت ان کے خاندان کے افراد نے بڑے منصوبوں سے رقوم خوردبرد کیں، شیخ حسینہ کے خاندان نے سرکاری زمین غیر قانونی طور پر حاصل کرنے کیلئےاثر و رسوخ استعمال کیا۔ بنگلا دیش کے موجودہ چیف ایڈوائزر محمد یونس کے مطابق، 234 ارب ڈالر بینکاری اور کاروباری شعبے سے لوٹ کر مختلف طریقوں سے بیرون ملک منتقل کیے گئے۔ دستاویزی فلم میں یہ بھی اجاگر کیا گیا کہ بھارت میں ایک دہائی سے اقتدار پر قابض نریندر مودی نے شیخ حسینہ کو پناہ دے کر آمریت کی حمایت کا ثبوت دیا۔ رپورٹ میں کہا گیا کہ مودی اور حسینہ دونوں نے اپنی آمرانہ حکمرانی کے دوران کرپشن، بدعنوانی اور نااہل سیاست کے ریکارڈ قائم کیے۔

Source: social media