بچوں کے سوشل میڈیا پر پابندی، ایلون مسک نے ہسپانوی وزیراعظم کو ظالم قرار دیدیا

میڈرڈ کی جانب سے سوشل میڈیا پر پابندیوں کی تجویز کے بعد ایلون مسک نے اسپین کے وزیر اعظم کو ‘ظالم’ قرار دے دیا۔ ٹیک ارب پتی اور ایکس کے مالک ایلون مسک نے سوشلسٹ ہسپانوی وزیر اعظم پیڈرو سانچیز کو 16 سال سے کم عمر بچوں کے لیے سوشل میڈیا پر نئی پابندیاں متعارف کروانے پر "ظالم اور عوام کا غدار” قرار دیا ہے۔ ایلون مسک کے تبصرے ہسپانوی وزیر اعظم کے اس اعلان کے جواب میں سامنے آئے ہیں کہ میڈرڈ ملک کے سوشل میڈیا قوانین میں نئی ​​تبدیلیاں متعارف کرائے گا۔ مسک نے ہسپانوی وزیر اعظم کی ایکس پوسٹ کے جواب میں لکھا کہ "ڈرٹی سانچیز اسپین کے لوگوں کے لئے ایک ظالم اور غدار ہے۔ اسپین نے کم عمر صارفین کے تحفظ کیلئے سخت قوانین متعارف کرانے کا فیصلہ کیا ہے اور سوشل میڈیا پلیٹ فارمز کو عمر کی تصدیق کانظام لازمی بنانے کا اعلان کیا ہے۔ ہسپانوی وزیراعظم کا کہنا ہے کہ نئے اقدامات کا مقصد بچوں کو سوشل میڈیا کے خطرات سے بچانا ہے اور دوسرے یوروپی ممالک پر بھی اسی طرح کے اقدامات پر عمل درآمد کرنے پر زور دیا ہے۔ انہوں نے انکشاف کیا کہ اسپین نے سرحد پار ریگولیشن کو مربوط کرنے کے لئے پانچ دیگر ممالک کے ساتھ ‘کولیشن آف دی ڈیجیٹل ولونگ’ میں شمولیت اختیار کی ہے۔ آسٹریلیا دسمبر میں 16 سال سے کم عمر بچوں کے لیے سوشل میڈیا پر پابندی لگانے والا پہلا ملک تھا، اس اقدام کو دیگر ممالک نے بھی عمر کی بنیاد پر پابندیوں لگانے کے لیے اقدامات کیے ہیں۔ اسپین سوشل میڈیا ایگزیکٹوز کو غیر قانونی مواد کے لیے جوابدہ ٹھہرانے، الگورتھمک ہیرا پھیری کو مجرمانہ بنانے اور عمر کی تصدیق کے مضبوط نظام کو مینڈیٹ کرنے کے لیے ایک بل بھی پیش کرے گا۔ ادھر یونان جلد ہی 15 سال سے کم عمر بچوں کے لیے سوشل میڈیا پر پابندی کا اعلان کرے گا۔ سینئر سرکاری ذرائع نے منگل کو رائٹرز کو بتایا کہ یونان 15 سال سے کم عمر کے بچوں کے لیے سوشل میڈیا پر پابندی کا اعلان کرنے کے "بہت قریب” ہے۔

Source: Social media