ایشیائی ممالک میں سیلابی آفات، ہلاک افراد کی تعداد 1250 سے تجاوز کر گئی

جکارتہ (: انڈونیشیا سمیت کئی ایشیائی ممالک میں سیلاب اور دیگر قدرتی آفات کے باعث ہلاک ہونے والے افراد کی تعداد 1250 سے تجاوز کر گئی۔ ایشیائی ممالک میں سیلاب، طوفان اور لینڈ سلائیڈنگ سے ایک ہفتے میں ایک ہزار دو سو پچاس سے زائد افراد لقمہ اجل بن گئے ہیں، انڈونیشیا میں شدید بارشوں اور سیلاب تباہی کی داستان رقم کر رہا ہے جہاں مختلف حادثات میں 753 ہلاکتیں رپورٹ ہو چکی ہیں۔ انڈونیشیا سب سے زیادہ متاثرہ ملک ہے، جہاں تقریباً 650 افراد ابھی تک لاپتا ہیں، سری لنکا میں بارشوں اور لینڈ سلائیڈنگ سے ہونے والی تباہی کے باعث 390 سے زائد افراد ہلاک ہوئے اور متعدد لاپتا ہیں۔ تھائی لینڈ میں بھی بڑے پیمانے پر سیلابی ریلے آئے اور سیلابی ریلوں نے درجنوں بستیوں کو ڈبو دیا ہے جن میں 176 افراد جان سے گئے۔ ملائیشیا میں مرنے والوں کی تعداد کم ہے، وہاں 3 ہلاکتیں رپورٹ ہوئی ہیں، مگر ہزاروں لوگ بے گھر ہو چکے ہیں اور سیکڑوں اب بھی پناہ گزین مراکز میں ہیں۔ ایشیائی ممالک میں قدرتی آفات کے نتیجے میں لاکھوں افراد متاثر ہوئے جب کہ گھروں اور بنیادی ڈھانچوں کو شدید نقصان پہنچا ہے اور ہزاروں لوگ بے گھر ہو چکے ہیں۔ ان واقعات نے لاکھوں لوگوں کی زندگی متاثر کی ہے، گھروں، فصلوں، انفراسٹرکچر، اور بنیادی سہولیات کو شدید نقصان پہنچا ہے۔ خاص طور پر ان علاقوں میں جہاں لینڈ سلائیڈنگ ہوئی، رسائی مشکل ہو گئی ہے، اور بہت سے گاؤں سے رابطے منقطع ہو چکے ہیں، سڑکیں ٹوٹ گئیں، پل بہہ گئے، اور امدادی ٹیموں کا پہنچنا مشکل ہو رہا ہے۔ متاثرہ لوگوں میں بے گھر خاندان، زخمی، گمشدگان، اور امداد کے منتظر لوگ شامل ہیں۔ بعض بچ جانے والے خاندان عزیزوں کی تلاش میں ہیں، امدادی کارروائیاں جاری ہیں، مگر موسم اور تباہ شدہ انفراسٹرکچر مشکلات بڑھا رہے ہیں۔ متاثرہ ممالک میں ایمرجنسی نافذ ہے اور فوجیوں، جنگی جہازوں، طبی جہازوں اور طیاروں کو امدادی سرگرمیوں پر روانہ کیا گیا ہے، تاکہ متاثرین تک خوراک، پانی، دوائی اور دیگر امداد پہنچائی جا سکے۔ بین الاقوامی ادارے اور امدادی تنظیمیں (بشمول اقوام متحدہ) متاثرہ ممالک کے ساتھ رابطے میں ہیں اور امداد کی پیشکش کر چکے ہیں۔

Source: social media