ایران میں نشانہ بنانے کے لائق کچھ نہیں بچا، جب چاہوں جنگ ختم کر سکتا ہوں: ڈونلڈ ٹرمپ

امریکہ کے صدر ڈونلڈ ٹرمپ کا کہنا ہے کہ وہ جب بھی چاہیں، ایران جنگ ختم کر سکتے ہیں۔ بدھ کے روز امریکی خبر رساں ادارے ایگزیوز کو دیے گئے ایک ٹیلیفونک انٹرویو میں صدر ٹرمپ کا کہنا تھا کہ ایران کے ساتھ جنگ جلد ہی ختم ہو جائے گی کیونکہ اب عملی طور نشانہ بنانے کے لیے ایران میں کچھ نہیں بچا ہے۔ ’کچھ یہاں، کچھ وہاں۔۔۔۔۔۔ میں جب اسے ختم کرنا چاہوں، ختم ہو جائے گی۔‘ گذشتہ روز امریکہ کے صدر ٹرمپ کی پریس سیکریٹری کیرولین لیوٹ سے جب صحافیوں نے پوچھا کہ ایران میں جاری جنگ کب تک چلے گی تو انھوں نے جواب دیا کہ ’ابتدائی منصوبہ چار سے چھ ہفتوں کا تھا، جس میں ایران کے میزائل اور بحریہ کو تباہ کرنا، اس کی جوہری صلاحیت ختم کرنا اور اس کے اتحادی گروہوں کو مٹانا شامل تھا۔‘ ان کا کہنا تھا کہ آپریشن مقررہ وقت سے آگے بڑھ رہا ہے، جیسا کہ صدر ٹرمپ نے پیر کو کہا تھا، لیکن جنگ اس وقت تک ختم نہیں ہوگی جب تک ایران ’مکمل اور غیر مشروط طور پر ہتھیار نہ ڈال دے، چاہے وہ اس کا اعلان کرے یا نہ کرے۔‘ پریس سیکریٹری کیرولین لیوٹ نے مزید کہا کہ یہ صدر ٹرمپ ہوں گے جو فیصلہ کریں گے کہ ایران اب براہِ راست خطرہ نہیں رہا۔

Source: social media