ایپسٹین فائلز ... امریکی وزارتِ انصاف نے ٹرمپ پر ایک خاتون کا الزام شائع کر دیا

امریکی وزارتِ انصاف نے گذشتہ روز ایف بی آئی کی وہ دستاویزات جاری کی ہیں جن میں ایک نامعلوم خاتون کے بیانات کا خلاصہ موجود ہے۔ ان بیانات میں صدر ڈونلڈ ٹرمپ پر جنسی نوعیت کے الزامات عائد کیے گئے ہیں۔ خاتون سے 2019 میں بدنامِ زمانہ مجرم جیفری ایپسٹین کے کیس کی تحقیقات کے دوران چار مرتبہ پوچھ گچھ کی گئی تھی۔ تازہ دستاویزات کے مطابق خاتون کا دعویٰ ہے کہ 1980 کی دہائی میں جب ان کی عمر 13 سے 15 سال کے درمیان تھی، ایپسٹین نے نیویارک یا نیوجرسی میں ان کا تعارف مستقبل کے صدر (ٹرمپ) سے کرایا تھا۔ وائٹ ہاؤس نے تاحال اس پر کوئی باضابطہ تبصرہ نہیں کیا، تاہم ترجمان کیرولین لیوٹ نے ان دعویٰ جات کو "مکمل طور پر بے بنیاد" قرار دیتے ہوئے مسترد کر دیا ہے جن کی پشت پر کوئی معتبر ثبوت موجود نہیں۔ خود وزارتِ انصاف نے بھی خبردار کیا ہے کہ ان دستاویزات میں صدر ٹرمپ کے خلاف کچھ "غلط اور اشتعال انگیز الزامات" شامل ہو سکتے ہیں۔ خبر رساں ادارہ رائٹرز ان بیانات کی آزادانہ تصدیق نہیں کر سکا۔ ریکارڈ ظاہر کرتا ہے کہ ایف بی آئی نے 2019 کے بعد اس خاتون سے مزید گفتگو بند کر دی تھی۔ یہ انکشافات ایک ایسے وقت میں ہوئے ہیں جب وزارتِ انصاف کو ایپسٹین کیس سے متعلق دستاویزات کی اشاعت کے حوالے سے کانگریس کی جانب سے سخت جانچ پڑتال کا سامنا ہے۔ ڈیموکریٹس نے ٹرمپ انتظامیہ پر متعلقہ ریکارڈ چھپانے کا الزام لگایا ہے، جبکہ ایوانِ نمائندگان کی ایک کمیٹی نے وزیرِ انصاف پام بونڈی کو طلب کرنے کے حق میں ووٹ دیا ہے تاکہ ان فائلوں سے نمٹنے کے طریقہ کار پر پوچھ گچھ کی جا سکے۔ واضح رہے کہ ڈونلڈ ٹرمپ ہمیشہ ان الزامات کی تردید کرتے رہے ہیں۔ ان کا کہنا ہے کہ ایپسٹین کے ساتھ ان کے تعلقات 2000 کی دہائی کے وسط میں ختم ہو گئے تھے اور وہ اس تاجر کی مجرمانہ سرگرمیوں سے کبھی واقف نہیں تھے۔ اکتوبر 2019 کی آخری تفتیشی رپورٹ کے مطابق، جب خاتون سے ٹرمپ کے بارے میں مزید معلومات فراہم کرنے کا پوچھا گیا، تو انہوں نے زندگی کے اس مرحلے پر ایسی معلومات دینے کے فائدے پر سوال اٹھایا جہاں اب کچھ کرنا ممکن نہ ہو۔

Source: social media