ہندوستان میں ہونے والی آئندہ مردم شماری کے حوالہ سے حکومت نے ایک بڑا اعلان کیا ہے۔ یہ ملک کی پہلی ڈیجیٹل مردم شماری ہوگی، جس میں عام لوگ خود بھی اپنی معلومات آن لائن درج کر سکیں گے۔ اس کے لیے حکومت ایک خاص ویب پورٹل لانچ کرنے جا رہی ہے۔ اس کے علاوہ موبائل ایپ کے ذریعہ بھی مردم شماری کا کام مکمل کیا جائے گا۔ واضح ہو کہ ہندوستان میں اب تک مردم شماری کے لیے گھر گھر جا کر سرکاری ملازمین کاغذ پر معلومات اکٹھا کرتے تھے۔ لیکن حکومت اب اس عمل کو مکمل طور سے ڈیجیٹل بنانے جا رہی ہے۔ پہلی بار موبائل ایپ اور آن لائن پورٹل کے ذریعہ لوگوں کے بارے میں معلومات اکٹھا کی جائیں گی۔ اس سے نہ صرف کام میں تیزی آئے گی، بلکہ ڈیٹا بھی محفوظ طریقے سے براہ راست حکومت کے مرکزی سرور تک پہنچ جائے گا۔ حکومت نے کہا ہے کہ اگر شہری چاہیں تو خود ہی اپنی مردم شماری کی معلومات ویب پورٹل پر درج کر سکتے ہیں۔ اس کے لیے 2 مرحلوں میں مردم شماری کی جائے گی۔ پہلا مرحلہ ’ہاؤس لسٹنگ اینڈ ہاؤسنگ سینسس‘ یعنی گھر اور مکان کی معلومات، اور دوسرا مرحلہ ’پاپولیشن اینومریشن‘ یعنی آبادی کی گنتی۔ دونوں مرحلوں میں لوگ اپنی معلومات خود درج کر سکیں گے۔ آئندہ مردم شماری 2026 اور 2027 میں 2 مرحلوں پر مشتمل ہوگا۔ پہلا مرحلہ یکم اپریل 2026 سے شروع ہوگا جس میں مکانوں کی گنتی کی جائے گی۔ دوسرا مرحلہ یکم فروری 2027 سے شروع ہوگا، جس میں لوگوں کی آبادی، ذات اور بقیہ ضروری معلومات اکٹھی کی جائیں گی۔ اس کے لیے 16 جون 2025 کو ایک سرکاری نوٹیفیکیشن جاری کیا گیا ہے۔ یہ آزادی کے بعد ہندوستان کی 8 ویں اور کُل 16 ویں مردم شماری ہوگی۔ اس کے لیے حکومت نے پورے ملک میں تقریباً 4 لاکھ لوگوں کو مقرر کیا ہے۔ ان ملازمین کو تین سطحوں پر ٹریننگ دی جائے گی، پہلے قومی ٹرینر، پھر ماسٹر ٹرینر اور اخیر میں فیلڈ ٹرینر انہیں تیار کریں گے۔ ہر گاؤں اور شہر کو چھوٹے چھوٹے حصوں میں تقسیم کیا جائے گا اور ہر حصہ کے لیے ایک ملازم ذمہ دار ہوگا، تاکہ کوئی بھی گھر یا شخص گنتی سے باہر نہ رہ جائے۔

Source: social media