ایک اور یورپی ملک عالمی عدالت میں اسرائیل کیخلاف مقدمے میں شامل

بیلجیئم نے بین الاقوامی عدالت انصاف میں اسرائیل کے خلاف جنوبی افریقا کے نسل کشی کے مقدمے میں شمولیت اختیار کر لی۔ بیلجیئم نے باضابطہ طور پر جنوبی افریقا کی جانب سے بین الاقوامی عدالت انصاف (آئی سی جے) میں اسرائیل پر غزہ کی پٹی میں نسل کشی کا الزام لگانے والے مقدمے میں شمولیت اختیار کر لی ہے۔ ایک بیان میں، ICJ – ہیگ میں قائم اقوام متحدہ کی اعلیٰ ترین عدالت نے کہا کہ بیلجیئم نے اس کیس میں شمولیت کا ایک اعلامیہ دائر کیا ہے۔ برازیل، کولمبیا، آئرلینڈ، میکسیکو، اسپین اور ترکی سمیت دیگر ممالک پہلے ہی کارروائی میں شامل ہو چکے ہیں۔ جنوبی افریقا نے دسمبر 2023 میں یہ مقدمہ دائر کیا جس میں دلیل دی کہ غزہ میں اسرائیل کی جنگ نسل کشی کے جرم کی روک تھام اور سزا سے متعلق اقوام متحدہ کے 1948 کے کنونشن کی خلاف ورزی کر رہی ہے۔ اسرائیل نے ان الزامات کو مسترد کرتے ہوئے اس مقدمے پر تنقید کی ہے۔ اگرچہ حتمی فیصلے میں برسوں لگ سکتے ہیں تاہم آئی سی جے نے جنوری 2024 میں عارضی اقدامات جاری کیے جس میں اسرائیل کو حکم دیا گیا کہ وہ غزہ میں نسل کشی کی کارروائیوں کو روکنے کے لیے اقدامات کرے اور انسانی امداد تک بلا رکاوٹ رسائی کی اجازت دے۔

Source: social media