آسٹریلوی وزیراعظم کی اسپتال پہنچ کر احمد الاحمد سے ملاقات، حقیقی ہیرو قرار

سڈنی : آسٹریلیا کے وزیراعظم انتھونی البانیز نے بونڈائی بیچ پر حملہ آور کو پکڑنے والے احمد الاحمد کی اسپتال میں عیادت کی۔ سڈنی کے مشہور بونڈائی ساحل پر دہشتگرد حملے کے دوران دیگر بے گناہوں کی جان بچانے کے لیے اپنی جان خطرے میں ڈال کر ایک دہشتگرد کو پکڑنے والے مسلمان نوجوان احمد الاحمد سے آسٹریلیا کے وزیراعظم انتھونی البانیز نے اسپتال میں ملاقات کی۔ آسٹریلوی وزیراعظم نے احمد الاحمد کی عیادت کی اور جلد صحتیابی کے لیے نیک خواہشات کا اظہار کرتے ہوئے ان کی بہادری کو سراہا اور انہیں حقیقی ہیرو قرار دیا۔ واضح رہے کہ پھل فروش احمد الاحمد بونڈائی ساحل پر حملے کے وقت اپنے دوست کے ساتھ کافی پینے آئے تھے کہ اچانک حملہ ہوتے دیکھ کر وہاں پارک کی گئی گاڑیوں کے پیچھے چھپے اور موقع ملتے ہی ایک حملہ آور کو دبوچ لیا۔ اس دوران وہ دو گولیاں لگنے سے زخمی بھی ہوئے تھے، جنہیں فوری طور پر اسپتال منتقل کیا گیا تھا، جہاں سرجری کر کے ان کے جسم سے دو گولیاں نکال دی گئیں اور ڈاکٹروں کے مطابق اب ان کی حالت تسلی بخش ہے۔ بونڈی بیچ دہشتگردی میں 16 افراد اپنی جان سے گئے جب کہ 42 زخمی ہوئے۔ اس دوران ایک دہشتگرد مارا گیا اور دو پولیس اہلکار بھی زخمی ہوئے۔ احمد الاحمد اپنے اس کارنامے کے بعد دنیا بھر میں چھائے ہوئے ہیں اور سربراہان مملکت سمیت اقوام عالم ان کی بہادری کو سراہتے ہوئے انہیں ہیرو کا خطاب دے رہے ہیں۔

Source: social media