اسرائیل نے لبنان میں مزید پہاڑی چوٹیوں پر قبضے کی منظوری دے دی

اسرائیلی وزیر دفاع یسرائیل کاٹز نے اعلان کیا ہے کہ وزیر اعظم بنجمن نیتن یاھو نے ان کے ساتھ مل کر لبنانی سرزمین کے اندر مزید بلند علاقوں کا کنٹرول حاصل کرنے کے لیے اسرائیلی فوج کی پیش قدمی کی منظوری دے دی ہے۔ یسرائیل کاٹز نے کہا کہ اس اقدام کا مقصد فائرنگ کو روکنا اور سرحدی اسرائیلی بستیوں کی حفاظت کرنا ہے جبکہ ان پانچ مقامات پر پہلے ہی اسرائیل کا کنٹرول ہے جو اس وقت لبنان کے اندر موجود ہیں۔ انہوں نے مزید کہا کہ اسرائیلی فوج نے رات کے وقت میدانی کنٹرول کو مضبوط بنانے کے لیے کام کیا اور لبنان میں حزب اللہ کے اہداف کے خلاف کارروائیاں جاری رکھنے کی تصدیق کی۔ اسرائیلی وزیر دفاع نے زور دے کر کہا کہ حزب اللہ اسرائیل کی جانب فائرنگ کی بھاری قیمت چکا رہی ہے اور مزید چکائے گی جبکہ انہوں نے الجلیل کی بستیوں کو سکیورٹی فراہم کرنے کے حکومتی عزم کا اعادہ کیا۔ اسرائیلی فوج نے بیروت کے جنوبی مضافاتی علاقے ضاحیہ پر فضائی حملے کیے ہیں جبکہ العربیہ اور الحدث کی نامہ نگار نے آج منگل کے روز ضاحیہ پر دوبارہ حملوں کی اطلاع دی ہے۔ اسرائیلی فوج نے یہ بھی اعلان کیا کہ اس نے ضاحیہ میں حزب اللہ کے قائدین کو نشانہ بنایا ہے۔

Source: social media