اسلام آباد کے مضافات میں نماز جمعہ کے بعد مسجد میں خودکش بم دھماکے میں 31 افراد جاں بحق

پاکستان کے دارالحکومت اسلام آباد کے علاقے ترلائی میں امام بارگاہ سے متصل مسجد میں جمعہ کی نماز کے بعد ہونے والے خودکش بم دھماکے میں کم سے کم 31 افراد جاں بحق اور 169 سے زائد زخمی ہوئے ہیں۔ ہسپتال ذرائع کے مطابق ہسپتالوں میں لائے گئے متعدد مریضوں کی حالت تشویشناک بتائی جا رہی ہے۔ اسلام آباد پولیس کے مطابق دھماکہ خودکش تھا۔ واقعے کے فوراً بعد پولیس اور ریسکیو ٹیمیں موقع پر پہنچ گئیں اور امدادی کارروائیاں شروع کر دی گئیں۔ آئی جی اسلام آباد کی ہدایت پر شہر بھر میں ایمرجنسی نافذ کر دی گئی ہے جبکہ سکیورٹی اداروں کو ہائی الرٹ کر دیا گیا ہے۔ دھماکے کے بعد پولی کلینک، پمز اور سی ڈی اے ہسپتال میں بھی ایمرجنسی نافذ کر دی گئی ہے۔ دھماکے کے مقام سے موصول ہونے والی ویڈیوز میں دیکھا جا سکتا ہے کہ دھماکے کی شدت کافی زیادہ تھی، جس کے نتیجے میں متعدد افراد زخمی ہوئے ہیں جبکہ اموات کی اطلاعات بھی سامنے آ رہی ہیں۔ ترجمان ضلعی انتظامیہ کا کہنا ہے کہ دھماکے کی جگہ کو مکمل طور پر سیل کر دیا گیا ہے جبکہ واقعے کی نوعیت اور ذمہ داروں کے تعین کے لیے تحقیقات جاری ہیں۔

Source: social media