امریکہ کے ساتھ بڑھا ہوا تناؤ : پیوتن کا وینزویلا کی حمایت کا اعلان

روس کے صدر ولادی میر پیوتن نے وینزویلا کے صدر نکولس مادورو کو وینزویلا کے لیے اپنی مکمل حمایت کا یقین دلایا ہے۔ کریملن کے مطابق یہ حمایت کا یہ اعادہ روسی صدر نے ایک فون کال پر کیا ہے۔ دونوں ملکوں کے صدور کے درمیان یہ فون کال اس وقت سامنے آئی ہے جب امریکہ نے وینزویلا کے ساحل سے ایک آئل ٹینکر کو قبضے میں لیا ہے۔ یہ تازہ ترین صورتحال امریکہ اور وینزویلا کے درمیان تعلقات کی پیچیدگی کا نیا اظہار ہے۔ خیال رہے روس اور وینزویلا کے درمیان گرمجوشی پر مبنی تعلقات رہے ہیں۔ رواں سال کے آغاز میں وینزویلا کے صدر مادورو نے ماسکو کا دورہ کیا تھا۔ اس موقع پر انہوں نے سالانہ فوجی پریڈ میں شرکت کرنے کے علاوہ روسی صدر پیوتن کے ساتھ شراکت داری معاہدوں پر دستخط کیے تھے۔ کریملن کے مطابق صدر پیوتن نے وینزویلا کے عوام کے ساتھ یکجہتی کا اظہار کیا۔ سرکاری طور پر جاری کیے گئے بیان میں مزید کہا گیا ہے کہ صدر پیوتن نے صدر مادورو کی حکومتی پالیسی کے لیے حمایت کی تصدیق کی۔ تاکہ بڑھتے ہوئے بیرونی دباؤ میں قومی مفادات اور خودمختاری کا تحفظ یقینی بنایا جائے۔ یاد رہے بدھ کے روز امریکی فوج نے وینزویلا کے ایک آئل ٹینکر کو قبضے میں لیا ہے۔ اس کارروائی میں امریکی فوج کے اہلکار ہیلی کاپٹر کے ذریعے ٹینکر کے ڈیک پر چڑھ گئے اور جہاز میں داخل ہوگئے۔ واشنگٹن وینزویلا کے بائیں بازو کے رہنما نکولس مادورو پر منشیات کی سربراہی و سرپرستی کا الزام لگاتا ہے۔ تاہم مادورو نے ہمیشہ اس الزام کی تردید کی ہے۔ مادورو کا موقف ہے کہ امریکہ وینزویلا کے تیل کے ذخائر کی وجہ سے حکومتی تبدیلی کی خواہش رکھتا ہے۔ دوسری جانب امریکی صدر ڈونلڈ ٹرمپ نے وینزویلا کے درمیانی فاصلے پر جنگی جہاز تعینات کر دیے ہیں۔ اب تک مشرقی بحر الکاہل اور بحیرہ کیریبین میں کشتیوں پر ہونے والے 22 حملوں میں 87 افراد ہلاک ہوئے ہیں۔

Source: social media