آج وینزویلا ہے کل کوئی اور ملک ہو سکتا ہے، صدر چلی

سانتیاگو : جنوبی امریکی ملک چلی کے صدر گیبریل بورک فونٹ نے وینزویلا کے خلاف امریکی کارروائی پر رد عمل میں کہا ہے کہ آج وینزویلا ہے کل کوئی اور ملک ہو سکتا ہے۔ ایکس پر پوسٹ کردہ ایک بیان میں چلی کے صدر گیبریل بورک فونٹ نے وینزویلا میں امریکی فوجی کارروائیوں پر اپنی حکومت کی ’’تشویش اور مذمت‘‘ کا اظہار کیا۔ انھوں نے دنیا کو خبردار کرتے ہوئے کہا کہ اگر آج ونیزویلا میں یہ ہو سکتا ہے تو وہ مستقبل میں کہیں اور بھی کچھ کر سکتے ہیں۔ انھوں نے کہا اس طرح سے قدرتی وسائل پر کنٹرول کا خطرہ علاقائی سالمیت کے اصول کی سنگین خلاف ورزی ہے اور خطے کی تمام ریاستوں کی سلامتی، خودمختاری اور استحکام کو خطرے میں ڈالتا ہے۔ اس لیے چلی اقوام متحدہ سے فوری طور پر کردار ادا کرنے کی اپیل کرتا ہے۔ صدر نے مزید کہا کہ ہم ملک کو متاثر کرنے والے سنگین بحران کا پرامن حل تلاش کرنے کا مطالبہ کرتے ہیں۔ وینزویلا کے بحران کو بات چیت اور کثیرالجہتی کی حمایت کے ذریعے حل کیا جانا چاہیے، نہ کہ تشدد یا غیر ملکی مداخلت کے ذریعے۔

Source: social media