عمران خان کی آنکھ کا علاج ایک خصوصی طبی ادارے میں ماہرینِ امراضِ چشم کریں گے: پاکستانی حکومت

پاکستان کی حکومت نے اعلان کیا ہے کہ عمران خان کی آنکھ کے جاری علاج کے تسلسل میں مزید معائنہ اور علاج ایک خصوصی طبی ادارے میں ماہرینِ امراضِ چشم کریں گے اور اِس کی تفصیلی رپورٹ بھی سپریم کورٹ میں جمع کرائی جائے گی۔ وزیر اطلاعات عطا تارڑ نے سوشل میڈیا سائٹ ایکس پر مزید لکھا کہ ’اس معاملے پر قیاس آرائیوں، بے بنیاد خبروں اور ذاتی مفاد کے لیے اسے سیاسی رنگ دینے کی کوششوں سے گریز کیا جائے۔‘ پاکستان کی سیاسی جماعتوں کے متحدہ محاذ تحریکِ تحفظِ آئینِ پاکستان نے عمران خان کے علاج کے لیے بین الاقوامی برادری کو اپنا کرادر ادا کرنے کی اپیل کی۔ تحریکِ کی جانب سے کہا گیا ہے کہ سلمان اکرم راجہ، سیکرٹری جنرل پی ٹی آئی نے پاکستان کی صورتحال پر بین الاقوامی برادری اور سفارتی برادری کو پیغام بھیجا ہے۔ پاکستان تحریکِ انصاف کے بانی عمران خان کی بہن علیمہ خان نے تصدیق کی ہے کہ عمران خان کی ان کی بیٹوں سے بات ہوئی ہے اور وہ اب عمران خان کا فوری علاج شروع کیے جانے کی منتظر ہیں۔

Source: social media