ٹی20 اور ٹیسٹ کا امتزاج: کرکٹ کا نیا فارمیٹ ’ٹیسٹ 20‘ متعارف

کھیل کی دنیا میں کرکٹ کا ایک نیا فارمیٹ متعارف کروایا گیا ہے جسے ٹیسٹ ٹوئنٹی کا نام دیا گیا ہے۔ ٹیسٹ ٹوئنٹی کرکٹ ویب سائٹ کے مطابق اس فارمیٹ کو کرکٹ کے ارتقا کا اگلا سنگِ میل قرار دیا جا رہا ہے اور یہ ایسا طرزِ کرکٹ ہو گا جو ٹیسٹ کی حکمتِ عملی کو ٹی ٹوئنٹی کی شدت اور رفتار سے جوڑے گا۔ یہ کرکٹ کی تاریخ کا پہلا 80 اوورز پر مشتمل فارمیٹ ہوگا جس میں ہر ٹیم 20، 20 اوورز کی دو اننگز کھیلے گی، اور پہلی اننگز کے رنز دوسری اننگز میں بھی شامل کیے جائیں گے۔ ایک ہی دن میں مکمل ہونے والا یہ میچ نتیجہ خیز، تیز اور حکمتِ عملی سے بھرپور ہوگا، جس کا نتیجہ جیت، ہار، ٹائی یا ڈرا، سب ممکن ہیں۔ ٹیسٹ ٹوئنٹی خاص طور پر 13 سے 19 سال کے نوجوان کرکٹرز کے لیے ڈیزائن کیا گیا ہے۔ دنیا بھر کے نوجوانوں کو ایک ایسا عالمی پلیٹ فارم دیا جائے گا جہاں وہ اپنی صلاحیت کو آزما سکیں۔ ٹیسٹ ٹوئنٹی کے مرکز میں ایک جدید مصنوعی ذہانت پر مبنی سکاؤٹنگ اور اینالٹکس سسٹم ہے، جو موشن سینسرز، ڈیٹا انٹیلیجنس اور پلیئر پروفائلنگ پر کام کرے گا۔ یہ نظام ٹیلنٹ کی تلاش اور ترقی کے طریقوں کو بدل دے گا، انتخابی عمل کو شفاف، میرٹ پر مبنی اور عالمی سطح پر قابلِ اعتماد بنائے گا۔ جنوری 2026 میں ’جونیئر ٹیسٹ ٹوئنٹی چیمپئن شپ‘ کا آغاز ہو گا جس میں چھ نمایاں فرنچائزز حصہ لیں گی۔ ان ٹیموں میں بین الاقوامی اور انڈین کھلاڑی شامل ہوں گے جو ایک ہی دن میں مکمل ہونے والے میچز میں ٹرافی کے لیے مدمقابل ہوں گے۔ یہ درمیانی طرز کی کرکٹ ہے جو نہ ٹیسٹ کی طرح پانچ دن کا، نہ ٹی ٹوئنٹی کی طرح مختصر ہے۔ اس نئے چوتھے فارمیٹ میں دونوں ٹیموں کو 20، 20 اوورز کی دو اننگز ملیں گی، اور کل 80 اوورز پر مشتمل میچ ایک دن میں مکمل ہوگا۔ اس کرکٹ میں پہلی اننگز کے رنز دوسری میں شامل ہوں گے فالو آن ممکن ہوگا۔ میچ کا نتیجہ جیت، ہار، ٹائی یا ڈرا کی صورت میں آسکتا ہے اور ٹائی کی صورت میں ’سپر اوور‘ کھیلا جائے گا۔ ڈرا کے لیے ضروری ہے کہ آخری گیند تک دوسری ٹیم کے کم از کم پانچ وکٹ باقی ہوں۔ ابتدائی مرحلے میں چھ فرنچائزز شامل ہوں گی، تین بین الاقوامی اور تین انڈین۔ اس لیگ کا سب سے منفرد پہلو ’کو اونرشپ‘ ماڈل ہے، جس کے تحت ہر فرنچائز کے شریک مالکان مشہور کرکٹرز، اداکاروں، کاروباری شخصیات اور عالمی ستاروں کے بیٹے یا بیٹیاں ہوں گے۔

Source: social media