نئی دہلی : قومی گیت وندے ماترم کے مکمل یا صرف پہلے دو اشعار گانے کے معاملے پر بی جے پی اور کانگریس کے درمیان جاری سیاسی تنازع مزید شدت اختیار کرگیا ہے۔ راجیہ سبھا رکن کپل سبل نے مرکزی وزیر داخلہ امت شاہ کے کانگریس کو ’’ملک دشمن‘‘ قرار دینے والے تبصرے کا جواب دیتے ہوئے سوال اٹھایا ہے کہ کیا بی جے پی کے تمام رہنماؤں نے ہمیشہ وندے ماترم کا مکمل ورژن گایا ہے؟

کپل سبل نے بالخصوص وزیراعظم نریندر مودی کے گجرات کے وزیراعلیٰ رہنے کے دور اور سابق وزیراعظم اٹل بہاری واجپائی کے دور کا حوالہ دیتے ہوئے پوچھا کہ کیا انہوں نے سرکاری یا نجی پروگراموں میں وندے ماترم کے تمام اشعار گائے تھے؟ سبَل نے سوشل میڈیا پر اپنے بیان میں سوال کیا کہ اگر بی جے پی کے رہنماؤں نے مکمل وندے ماترم نہیں گایا تو کیا انہیں بھی ’’ملک دشمن‘‘ قرار دیا جائے گا؟

یہ تنازع اس وقت مزید تیز ہوا جب مرکزی وزیر داخلہ امت شاہ نے کانگریس ورکنگ کمیٹی (سی ڈبلیو سی) کے اس فیصلے پر سخت تنقید کی کہ پارٹی اپنے پروگراموں میں وندے ماترم کے صرف پہلے دو اشعار گائے گی۔ امت شاہ نے کانگریس کے اس فیصلے کو ’’ملک دشمن‘‘ قرار دیتے ہوئے الزام لگایا تھا کہ یہ فیصلہ ووٹ بینک کی سیاست اور مبینہ خوشامد کی پالیسی سے متاثر ہے۔

انہوں نے یہ بھی دعویٰ کیا کہ 1937 میں کانگریس نے خوشامد کی سیاست کے تحت وندے ماترم کو دو حصوں میں تقسیم کیا تھا۔ امت شاہ نے کہا تھا کہ وندے ماترم کی 150ویں سالگرہ کے موقع پر مرکزی حکومت نے اس تاریخی غلطی کو درست کیا اور مکمل گیت کو قانونی شناخت دی۔ انہوں نے کانگریس سے اس معاملے پر ملک بھر میں آواز اٹھانے کی بھی اپیل کی تھی۔

امت شاہ کے بیان پر ردعمل دیتے ہوئے کپل سبل نے سوال کیاکہ کیا 1950 کے بعد بی جے پی نے اپنے نجی یا سرکاری پروگراموں میں ہمیشہ وندے ماترم کے تمام اشعار گائے؟ انہوں نے بالخصوص پوچھا کہ کیا نریندر مودی نے گجرات کے وزیراعلیٰ کی حیثیت سے اور اٹل بہاری واجپائی نے وزیراعظم کی حیثیت سے وندے ماترم کا مکمل ورژن گایا تھا؟

سبل نے اسی تناظر میں امت شاہ کے ’’ملک دشمن‘‘ والے تبصرے پر سوال اٹھاتے ہوئے کہا کہ اگر مکمل گیت نہ گانے والوں کو ملک دشمن قرار دیا جارہا ہے تو پھر یہی پیمانہ سب پر لاگو ہونا چاہیے۔ انہوں نے بی جے پی پر ووٹ بینک کی سیاست کا الزام بھی عائد کیا۔ کانگریس ورکنگ کمیٹی نے بدھ کو فیصلہ کیا تھا کہ پارٹی اپنے پروگراموں میں وندے ماترم کے پہلے دو اشعار ہی گائے گی۔

کانگریس کے سینئر رہنما جئے رام رمیش نے اس فیصلے کا دفاع کرتے ہوئے کہا کہ 1937 میں قومی اجتماعات میں وندے ماترم کے صرف پہلے دو اشعار گانے کی سفارش محض کسی ایک شخص کا فیصلہ نہیں تھی بلکہ آزادی کی تحریک سے وابستہ کئی اہم رہنماؤں کی غوروفکر کے بعد سامنے آنے والی پالیسی تھی۔ کانگریس کا کہنا ہے کہ پارٹی 1937 سے وندے ماترم کے پہلے دو اشعار گاتی رہی ہے اور اس فیصلے کو تاریخی پس منظر میں دیکھا جانا چاہیے۔


دوسری جانب بی جے پی کا کہنا ہے کہ قومی گیت کے مکمل متن کی اہمیت کو کم کرنا آزادی کی جدوجہد اور قومی جذبات کی توہین کے مترادف ہے، جبکہ کانگریس اسے اپنے تاریخی فیصلے اور مذہبی و سماجی حساسیت کے تناظر میں دیکھ رہی ہے۔ یہ تنازع ایسے وقت میں شدت اختیار کرگیا ہے جب 15 اگست 2026 کو لال قلعے کی تقریب میں پہلی مرتبہ وندے ماترم کے مکمل چھ اشعار پیش کیے گئے، جس کے بعد قومی گیت کی مکمل پیشکش اور تاریخی پس منظر پر سیاسی بحث مزید تیز ہوگئی۔

Source: Admin