سوریا کمار کو باہر کرنا ایک مشکل فیصلہ تھا: اگرکر

ممبئی، 6 جون : ہندستان کے چیف سلیکٹر اجیت اگرکر نے کہا ہے کہ حالیہ ٹی-20 ورلڈ کپ جیتنے والے کپتان سوریا کمار یادو کو ٹیم سے باہر کرنا ایک "مشکل فیصلہ" تھا، جس پر سلیکشن کمیٹی نے "کافی غور و خوض کیا"۔ یہ فیصلہ جزوی طور پر سوریا کمار کی حالیہ فارم، جزوی طور پر شریس آئیر کی ٹی-20 فارم اور آئی پی ایل میں ان کی کپتانی کو دیکھتے ہوئے لیا گیا ہے ۔ سلیکٹرز کا ماننا ہے کہ اکتوبر 2028 میں ہونے والے اگلے ٹی-20 ورلڈ کپ کو ذہن میں رکھتے ہوئے یہی "آگے بڑھنے کا بہترین طریقہ" تھا۔ ٹی-20 ورلڈ کپ جتانے والے کپتان کو نہ صرف کپتانی سے ہٹانا بلکہ پوری ٹیم سے ہی باہر کرنا ہندوستانی کرکٹ میں غیر معمولی ہے ، لیکن اگرکر نے کہا کہ یہ فیصلہ "ٹیم کی مستقبل کی ضروریات کو ذہن میں رکھتے ہوئے " لیا گیا۔ ممبئی میں ہفتہ کو آئرلینڈ اور انگلینڈ کے لیے ٹی-20 ٹیم کا اعلان کرتے ہوئے اگرکر نے کہا کہ "سوریا کے حوالے سے یہ یقینی طور پر ایک مشکل فیصلہ تھا، کیونکہ انہوں نے حال ہی میں ورلڈ کپ جتایا تھا۔ لیکن عام طور پر ہر ورلڈ کپ کے بعد ہم یہ اندازہ لگاتے ہیں کہ آگے بڑھنے کا بہترین راستہ کیا ہے ۔" انہوں نے مزید کہا کہ "یہ جزوی طور پر ان کی اپنی فارم کا معاملہ تھا، لیکن اگلے دو سال کے سائیکل یا اگلے ورلڈ کپ تک کے وقت کو دیکھتے ہوئے ہمیں لگا کہ یہی آگے بڑھنے کا بہترین طریقہ ہے ۔ اور جیسا میں نے کہا کہ شریس اس ذمہ داری کے پوری طرح حقدار ہیں۔" حالیہ آئی پی ایل میں سوریا کمار نے 13 اننگز میں 270 رن بنائے ، جو آئی پی ایل 2017 کے بعد ان کا سب سے کم اسکور تھا۔ تب انہوں نے کے کے آر کے لیے سات اننگز میں 105 رن بنائے تھے ۔ آئی پی ایل 2026 میں ان کا اوسط 20.76 رہا، جو آئی پی ایل 2017 کے بعد سب سے کم تھا، جبکہ 147.54 کا ان کا اسٹرائیک ریٹ، آئی پی ایل 2022 کے بعد ان کا سب سے خراب اسٹرائیک ریٹ رہا۔ حالانکہ 2025 میں بھی سوریا کمار کی فارم کچھ خاص نہیں تھی۔ انہوں نے اس سال کی شروعات انگلینڈ کے خلاف گھریلو سیریز میں پانچ اننگز میں صرف 28 رن بنا کر کی تھی، جہاں ان کی اوسط صرف 5.60 رہی تھی۔

Source: UNI NEWS