سوڈان میں جنازے پر حملہ، 40 افراد جاں بحق

سوڈان میں خونریزی کا ایک اور بڑا واقعہ پیش آگیا۔ اقوام متحدہ کے مطابق سوڈان کے علاقے کردوفان میں جنازے پر حملہ کیا گیا جس میں 40 افراد جاں بحق ہو گئے۔ شمالی کردوفان کے شہر الابیض میں حملہ کیا گیا۔ اقوام متحدہ کے دفتر برائے انسانی ہمدردی نے حملے کی تصدیق کرتے ہوئے کہا ہے کہ الابیض اب بھی سرکاری فوج کےکنٹرول میں ہے۔ واقعے کے بعد آرایس ایف کی پیش قدمی کی اطلاعات بھی ملی ہیں۔ رپورٹس کے مطابق آرایس ایف شہر پر بڑے حملے کی تیاری میں مصروف ہے۔ تیل سے مالامال علاقے میں سوڈانی فوج اور آرایس ایف میں جھڑپیں شدت اختیار کر گئی ہیں۔ خانہ جنگی اور قتل عام کے بعد سوڈان کے ٹکڑے ہونے کا خدشہ بڑھ گیا۔ عرب میڈیا کے مطابق الفاشر کے بعد آرایس ایف نے دارفور کے تمام 5صوبائی دارالحکومتوں پر قبضہ کر لیا ہے جس سے سوڈان میں تقسیم کے خطرات بڑھ گئے ہیں۔ آر ایس ایف مغربی و جنوبی علاقوں پر قابض ہے جب کہ فوج شمال و مشرقی خطے میں موجود ہے۔ آرایس ایف نے الفاشر پر قبضے کے بعد وسطی کوردفان پر حملےکی تیاری شروع کر دی ہے۔ انٹرنیشنل کرمنل کورٹ نے بھی سوڈان میں مظالم پر گہری تشویش کا اظہار کیا ہے۔ اقوام متحدہ کے سیکریٹری جنرل نے سوڈان میں تشدد فوری بند کرنے کا مطالبہ کرتے ہوئے کہا ہے کہ بحران تیزی سے بےقابو ہوتا جا رہا ہے۔ الفاشر 2سال سے زیادہ جاری خانہ جنگی کے دوران سوڈانی فوج کا آخری مضبوط گڑھ تھا۔ 26اکتوبر کو آرایس ایف کے قبضے کے بعد شہر میں خوفناک قتل وغارت شروع ہوئی۔

Source: social media