ہندوپناہ گزینوں کو 31 دسمبر تک ڈھائی لاکھ افراد کو شہریت دیں گے شوبھندو
شمالی 24 پرگنہ کے ٹھاکر نگر میں ایک جلسے کے دوران وزیر اعلیٰ سوویندو ادھیکاری کے وعدے کے محض 24 گھنٹے کے اندر ہی ریاستی سیکریٹریٹ نوبنّو نے کام شروع کر دیا۔ آئندہ 31 دسمبر تک ڈھائی لاکھ متوا اور پناہ گزینوں کو شہریت دینے کے ہدف کے ساتھ انتظامی سرگرمیاں شروع ہو گئی ہیں۔ اس کام میں تیزی لانے کے لیے دو اضلاع میں 12 آئی اے ایس افسران کو خصوصی ذمہ داری سونپی گئی ہے۔ پیر کے روز ریاست کے محکمہ? عملہ اور انتظامی اصلاحات کی جانب سے ایک حکم نامہ جاری کیا گیا۔ اس میں بتایا گیا ہے کہ ترمیم شدہ شہریت قانون (سی اے اے) سے متعلق کاموں کو تیزی سے نمٹانے کے مقصد سے فی الحال دو ماہ کے لیے ان افسران کو شمالی 24 پرگنہ اور ندیا اضلاع میں تعینات کیا جا رہا ہے۔
اتوار کے روز ٹھاکر نگر میں گوسائیں سمیلن میں شرکت کے دوران وزیر اعلیٰ نے پناہ گزینوں اور متوا برادری کے افراد کو سی اے اے کے تحت شہریت کے سرٹیفکیٹ دینے کے لیے وقت مقرر کیا تھا۔ جلسے سے خطاب کرتے ہوئے انہوں نے کہا تھا، ”مغربی بنگال میں اب تک صرف 25 ہزار درخواست گزاروں کو سی اے اے کے ذریعے شہریت ملی ہے۔ اب میں اس عمل کو تیزی سے مکمل کرنا چاہتا ہوں۔ 31 دسمبر تک ڈھائی لاکھ درخواست گزاروں کی سماعت جلد مکمل کرکے انہیں شہریت دی جائے گی۔“ اسی کے ساتھ انہوں نے بتایا کہ سی اے اے کے تحت شہریت حاصل کرنے کے بعد حقیقی طور پر اہل درج فہرست ذات کے افراد کو جلد ایس سی سرٹیفکیٹ دینے کا انتظام بھی حکومت کرے گی۔ وزیر اعلیٰ کے اس اعلان کے اگلے ہی دن نوبنّو کی جانب سے اٹھائے گئے اس قدم کو سیاسی اور انتظامی حلقوں میں کافی اہم قرار دیا جا رہا ہے۔
شمالی 24 پرگنہ اور ندیا، ان دونوں اضلاع میں پناہ گزینوں اور متوا برادری کے افراد کی آبادی سب سے زیادہ ہے۔ 2019 کے لوک سبھا انتخابات سے ہی متوا برادری کے ایک بڑے طبقے کی حمایت بی جے پی کو حاصل رہی ہے۔ 2024 کے لوک سبھا انتخابات میں مغربی بنگال میں مجموعی طور پر بی جے پی کی نشستیں کم ہونے کے باوجود بانگاو¿ں اور راناگھاٹ حلقوں میں بی جے پی امیدواروں نے بڑے فرق سے کامیابی حاصل کی تھی۔ اس کے نتیجے میں رکن پارلیمنٹ شانتی نو ٹھاکر کو مرکزی وزیر مملکت کے عہدے پر برقرار رکھا گیا۔ بعد ازاں اسمبلی انتخابات میں بھی شمالی 24 پرگنہ اور ندیا اضلاع کے متوا اکثریتی حلقوں میں بی جے پی نے کامیابی حاصل کی۔ متوا برادری کے لیے شہریت کا معاملہ ہمیشہ سب سے زیادہ ترجیح کا حامل رہا ہے۔ لہٰذا شہریت اور سی اے اے کے معاملے پر متوا برادری کے ساتھ کھڑے ہونے کا واضح پیغام دینے کے لیے سوویندو ادھیکاری کی حکومت نے یہ فوری قدم اٹھایا ہے۔
انتظامی ذمہ داری سونپے گئے افسران میں رومیِل دویدی، مدیتا بنسل، راو¿ل جے سنگھ ریڈی، تیجسوی، سوامی سنیل راملنگ اور رجت یادو کو شمالی 24 پرگنہ بھیجا گیا ہے۔ دوسری جانب ندیا ضلع کی ذمہ داری ریتیکا رتھ، چوگلے ادیتی سنجے، ابھیشیک چودھری، میگھنا چکرورتی، ساکشم بھاٹیہ اور ہمانشو بھاسکر کو سونپی گئی ہے۔ آئندہ دو ماہ تک یہ افسران ضلعی انتظامیہ کے ساتھ تال میل قائم کرکے سی اے اے سے متعلق درخواستوں کے عمل کو تیزی سے آگے بڑھائیں گے۔ درخواستوں کی جانچ، سماعت اور قانونی دستاویزات کی چھان بین کے لیے اضافی انتظامی نگرانی کی ضرورت تھی۔ اسی وجہ سے ریاستی کیڈر کے 12 نئے افسران کو میدان میں اتارا گیا ہے۔ اس سلسلے میں نوبنّو کا واضح پیغام ہے کہ مقررہ مدت کے مطابق 31 دسمبر تک ڈھائی لاکھ افراد کو شہریت دینے کا ہدف پورا کرنا ہوگا۔ مجموعی طور پر وزیر اعلیٰ کے اعلان کے 24 گھنٹے کے اندر انتظامی قدم اٹھا کر حکومت نے واضح کر دیا ہے کہ شہریت اور پناہ گزینوں کی بازآبادکاری کے معاملے میں اب مزید کوئی تاخیر نہیں ہوگی۔
ہندوپناہ گزینوں کو 31 دسمبر تک ڈھائی لاکھ افراد کو شہریت دیں گے شوبھندو...
Source: Admin
