واشنگٹن: امریکی فوج نے خلاء میں ہتھیار نصب کرنے کی تصدیق کردی، میری لینڈ میں ایئر، اسپیس اینڈ سائبر کانفرنس میں ایئر فورس سیکریٹری کا کہنا تھا کہ امریکا نے زمین کے اوپر خلا میں اپنے ہتھیار نصب کیے ہیں۔

غیر ملکی ذرائع ابلاغ کے مطابق ایئرفورس سیکریٹری نے کانفرنس کے شرکاء کو یہ تفصیلات نہیں بتائیں کہ امریکا کے نصب کردہ ہتھیار کتنے اور کس نوعیت کے ہیں؟

رپورٹس کے مطابق انہوں نے کہا کہ زمین کے ساتھ خلا میں بھی امریکی بالادستی کو قائم رکھنے کے لیے ہتھیاروں کی تنصیب ضروری تھی۔

پچھلے سال صدر ٹرمپ نے ’گولڈن ڈوم‘ میزائل ڈیفنس سسٹم کا اعلان کیا تھا، جس میں خلا میں نصب سینسرز اور انٹرسیپٹرز کا نظام شامل ہوگا۔

امریکی صدر کا کہنا تھا کہ یہ سسٹم دنیا کے دوسری طرف سے فائر میزائلوں کو بھی روک سکے گا۔

پنٹاگون کے مطابق روس اور چین سے فائر کیے بین البراعظمی بیلسٹک میزائلوں کو روکنے کے لیے نئے سسٹم کی ضرورت ہے۔