ریت کے کاروباری سے بھتہ وصولی کا الزام، بردوان میں بی جے پی رہنما کو باندھ کر گاو¿ں والوں کا احتجاج
حکومت کے اعلیٰ حکام سمیت بی جے پی کی جانب سے بھی بھتہ خوری کے خلاف سخت کارروائی کی بات کہی جا رہی ہے۔ ان ہدایات کو نظرانداز کرتے ہوئے بی جے پی کارکنوں کے خلاف بھتہ وصولی کے الزامات سامنے آئے ہیں۔ مشرقی بردوان کے جمال پور کے چوبیریا میں ریت کے ایک اسٹاک پوائنٹ پر جا کر ایک بی جے پی رہنما اور اس کے ساتھی نے لاکھوں روپے کا مطالبہ کیا۔
اس کے بعد گاو¿ں والوں نے مذکورہ رہنما سمیت چار افراد کو رسی سے باندھ دیا۔ اس واقعے کی ویڈیو سوشل میڈیا پر وائرل ہو گئی۔ متعلقہ ٹھیکیدار نے معاملے کی اطلاع جمال پور کے رکن اسمبلی ارون ہلدار کو دی اور پولیس میں شکایت درج کرائی۔ پولیس موقع پر پہنچی اور چاروں افراد کو حراست میں لے گئی۔ اس واقعے سے سیاسی حلقوں میں ہلچل مچ گئی ہے۔ معلوم ہوا ہے کہ بی جے پی مذکورہ رہنما کے خلاف کارروائی کرے گی۔
برسات کے موسم میں ریت نکالنے کا کام بند رہتا ہے۔ ریت کے ٹھیکیدار سید نیازالدین نے سرکاری ضابطوں کے مطابق برسات کے موسم کے لیے ریت ذخیرہ کی تھی۔ جمال پور کے چوبیریا میں ریت کا اسٹاک پوائنٹ بنایا گیا تھا۔ وہاں سے پیر کی دیر رات ٹرک کے ذریعے ریت بھیجی جا رہی تھی۔ اسی وقت بی جے پی رہنما سمیت کچھ لوگ وہاں پہنچے۔ معلوم ہوا ہے کہ بھتہ وصول کرنے کی کوشش کے دوران اسٹاک پوائنٹ کے کارکنوں کے ساتھ ان کی بحث ہوگئی۔ شور سن کر مقامی لوگ وہاں پہنچے۔ انہوں نے بی جے پی کے جمال پور-1 منڈل کے جنرل سیکریٹری بسنت پانجا سمیت چار افراد کو رسی سے باندھ دیا۔ چند افراد وہاں سے فرار ہوگئے۔
جمال پور-1 منڈل کے صدر پردھان چندر پال نے منگل کو کہا، ”منڈل کے جنرل سیکریٹری بسنت پانجا سمیت کچھ لوگ بھتہ وصول کرنے گئے تھے۔ میں نے سوشل میڈیا پر ویڈیو دیکھی ہے۔ ہمارے ریاستی صدر شَمیک بھٹاچاریہ، وزیر اعلیٰ شوبھندو ادھیکاری اور ہمارے رکن اسمبلی نے بارہا کہا ہے کہ بھتہ خوری برداشت نہیں کی جائے گی۔ ہم اس رہنما کے اس واقعے کے بارے میں ریاستی قیادت کو اطلاع دیں گے۔ جو بھی اس طرح کی غیر قانونی سرگرمیوں میں ملوث ہوگا، پولیس اور انتظامیہ اس کے خلاف قانونی کارروائی کرے گی۔“
نیازالدین نے کہا، ”میرے کارکنوں سے بڑی رقم بطور بھتہ طلب کی گئی۔ مجھے اطلاع ملتے ہی میں نے رکن اسمبلی کو بتایا۔ او سی کو بھی اطلاع دی۔ میں رکن اسمبلی کا شکر گزار ہوں کہ انہوں نے فوراً کارروائی کرنے کی یقین دہانی کرائی۔“