افغان مہاجرین کو اضافی مہلت نہیں دی جائے گی: پاکستان

پاکستان کے وزیراعظم شہباز شریف نے کہا ہے کہ افغانستان کا پاکستان پر حالیہ حملہ اور خوارج کی پاکستان میں دراندازی کی کوششوں کا ساتھ دینا تشویش ناک امر ہے۔ وزیراعظم ہاؤس سے جمعے کو جاری کردہ بیان کے مطابق وزیراعظم نے یہ بات اسلام آباد میں افغان پناہ گزینوں کی وطن واپسی کے حوالے سے اعلیٰ سطح کے اجلاس میں کہی ہے۔ انہوں نے کہا کہ ’نائب وزیراعظم و وزیرخارجہ، وزیردفاع اور اعلیٰ حکومتی عہدے دار متعدد بار افغانستان کے دورے پر گئے اور افغان نگران حکومت کو پاکستان میں دہشت گردی کے لیے افغان سرزمین کے استعمال کو روکنے کے حوالے سے مذاکرات کیے۔‘ وزیراعظم نے ہدایت کی کہ ’تمام صوبائی حکومتیں، وفاقی و صوبائی ادارے قریبی تعاون کے ساتھ پاکستان میں غیرقانونی طور پر موجود افغان باشندوں کی جلد از جلد وطن واپسی یقینی بنائیں گے۔‘ اجلاس کو افغان مہاجرین کی وطن واپسی کے حوالے سے تفصیلی بریفنگ دی گئی اور بتایا گیا کہ پاکستان میں مقیم افغان مہاجرین کی مرحلہ وار وطن واپسی شروع کی گئی۔ 16 اکتوبر 2025 تک 14 لاکھ 77 ہزار 592 افغانیوں کو واپس بھیجا جا چکا ہے۔ افغان مہاجرین کو کسی بھی قسم کی اضافی مہلت نہیں دی جائے گی اور ان کی وطن واپسی جلد یقینی بنائی جائے گی۔ اجلاس کو بتایا گیا کہ ’پاکستان میں صرف انہی افعان باشندوں کو رہنے کی اجازت ہو گی جن کے پاس پاکستان کا ویزہ موجود ہو گا۔ افغانستان کی جانب ایگزٹ پوائنٹس کی تعداد کو بڑھایا جا رہا ہے تاکہ افغانوں کی وطن واپسی سہل اور تیزی سے ممکن ہو سکے۔‘

Source: social media