سعودی کلب کی میسی کو حیران کُن طور پر بلینک چیک کی پیشکش کا انکشاف

سعودی کلب الاتحاد کے صدر انمار الحائلی نے حیران کن انکشاف کرتے ہوئے کہا کہ عالمی شہرت یافتہ فٹبال اسٹار لیونل میسی کو بلینک چیک کی پیشکش کی ہے۔ اس سے قبل انہوں نے ارجنٹائن فٹبالر کو 1.4 ارب ڈالر کی پیشکش بھی کی تھی، جسے میسی مسترد کر چکے ہیں۔ غیرملکی میڈیا رپورٹس کے مطابق لیونل میسی نے حال ہی میں انٹر میامی کے ساتھ 3 سالہ نیا معاہدہ کیا ہے، جس کے تحت وہ 2028 تک پنک جرسی میں کھیلتے رہیں گے، تاہم اس کے باوجود سعودی کلبز کی دلچسپی کم نہیں ہوئی۔ میڈیا رپورٹس کے مطابق الاتحاد کے صدر انمار الحائلی نے انکشاف کرتے ہوئے کہا کہ ارجنٹائن کے اسٹار فٹبالر کے لیے ایک غیر معمولی معاہدہ تیار کر رکھا ہے۔ انہوں نے کہا کہ اگر میسی ہمارے ساتھ معاہدہ کرنے پر رضامند ہو جائیں تو میں انہیں ایسا کنٹریکٹ دوں گا جس میں وہ اپنی مرضی کے مطابق رقم حاصل کر سکیں گے، حتیٰ کہ معاہدے کی مدت عمر بھر کے لیے بھی ہو سکتی ہے۔ انمار الحائلی نے مزید بتایا کہ ماضی میں، میں نے انہیں 1.4 ارب یورو کی پیشکش کی تھی، تاہم انہوں نے خاندانی وجوہات کی بنا پر اسے مسترد کر دیا تھا۔ انہوں نے اس بات پر زور دیا کہ مالی طور پر میسی کے ساتھ معاہدے کی کوئی حد نہیں ہے، کیونکہ دنیا کے بہترین کھلاڑی کو ٹیم میں شامل کرنا ہر طرح سے فائدہ مند ثابت ہو سکتا ہے۔ واضح رہے کہ لیونل میسی اس وقت انٹر میامی کے ساتھ وابستہ ہیں اور رواں سال کے وسط میں اپنی ٹیم کے نئے اسٹیڈیم کی افتتاحی تقریب کا بھی حصہ بنیں گے۔

Source: social media