سعودی عرب، امارات اور قطر نے غزہ معاہدے میں کلیدی کردار ادا کیا:امریکی صدر

امریکی صدر ڈونلڈ ٹرمپ نے کہا ہے کہ سعودی عرب، قطر، امارات سمیت دیگر عرب اور مسلمان ممالک نے غزہ معاہدے کی کامیابی میں فیصلہ کن کردار ادا کیا۔ ان کا کہنا تھا کہ اس معاہدے کا مقصد پائیدار امن کو یقینی بنانا ہے۔ صدر ٹرمپ نے مزید کہا کہ بین الاقوامی امن فورس کی تیاری کا مرحلہ اپنے اختتامی مراحل میں ہےاور جلد ہی یہ فورس غزہ میں استحکام کے قیام کے لیے تعینات کی جا سکتی ہے۔ ان کے بقول"اب مشرقِ وسطیٰ میں حقیقی امن کے امکانات روشن ہیں"۔ انہوں نے قطر کے کردار کی تعریف کرتے ہوئے کہاکہ "دوحہ واشنگٹن کا ایک عظیم اتحادی ہے اور اگر ضرورت پڑی تو قطر غزہ میں امن فورس بھیجے گا"۔ صدر ٹرمپ نے یہ گفتگو قطر کے امیر شیخ تمیم بن حمد آل ثانی اور وزیرِاعظم شیخ محمد بن عبدالرحمن آل ثانی سے ملاقات کے دوران کی۔ یہ ملاقات امریکی صدر کے طیارے کے دوحہ میں مختصر قیام کے موقع پر ہوئی، جہاں طیارہ امریکی اڈے "العديد" پر ایندھن بھرنے کے لیے رکا۔ ٹرمپ بعد ازاں ملائیشیا روانہ ہوئے جہاں وہ ایک علاقائی سربراہی اجلاس میں شرکت کر رہے ہیں۔ ان کا یہ ایشیائی دورہ جمعرات تک جاری رہے گا۔

Source: Social media