روہت شرما نے بین الاقوامی کرکٹ میں 20 ہزار رن کیے مکمل، جنوبی افریقہ کے خلاف تیسرے وَنڈے میں بنائے 75 رن

ہندوستانی کرکٹ ٹیم کے سابق کپتان روہت شرما اس وقت اپنے شاندار فارم میں نظر آ رہے ہیں۔ انھوں نے جنوبی افریقہ کے خلاف کھیلے جا رہے تیسرے وَنڈے میچ میں شاندار نصف سنچری بنائی اور اس دوران انھوں نے بین الاقوامی کرکٹ میں اپنے 20 ہزار رن بھی مکمل کر لیے۔ روہت نے آج آؤٹ ہونے سے پہلے 73 گیندوں میں 3 چھکوں اور 7 چوکوں کی مدد سے 75 رن بنائے۔ جب انھوں نے اپنی اننگ کا 27 رن مکمل کیا، تبھی وہ انٹرنیشنل کرکٹ میں 20 ہزار رن مکمل کرنے والے چوتھے ہندوستانی کھلاڑی بن گئے۔ روہت سے پہلے سچن تندولکر، وراٹ کوہلی اور راہل دراوڑ نے یہ کارنامہ انجام دیا ہے۔ بین الاقوامی کرکٹ میں اپنا 505واں میچ کھیل رہے روہت شرما نے جنوبی افریقہ کے خلاف 15ویں اوور میں یہ تاریخ رقم کی۔ روہت کے اب ٹیسٹ، وَنڈے اور ٹی-20 انٹرنیشنل میں مجموعی طور پر 20 ہزار سے زیادہ رن ہو گئے ہیں۔ انٹرنیشنل کرکٹ میں 20 ہزار رن پورے کرنے والے روہت شرما دنیا کے 14ویں کرکٹر ہیں۔ ان سے قبل سچن تندولکر، کمار سنگکارا، وراٹ کوہلی، رکی پونٹنگ، مہیلا جئے وردھنے، جیک کیلس، راہل دراوڑ، برائن لارا، جو روٹ، سنتھ جئے سوریہ، شیونارائن چندرپال، انضمام الحق اور اے بی ڈیویلیئرس نے ایسا کیا ہے۔ انٹرنیشنل کرکٹ میں 20 ہزار رن بنانے والے ہندوستانی کھلاڑیوں کی بات کریں تو سچن تندولکر نے 34 ہزار 357 رن، وراٹ کوہلی نے تقریباً 28 ہزار رن، راہل دراوڑ نے 24 ہزار 208 رن اور روہت شرما نے 20 ہزار سے زائد رن بنا لیے ہیں۔ روہت شرما اور وراٹ کوہلی اب بھی وَنڈے کرکٹ کھیل رہے ہیں، اس لیے ان دونوں کے رن ابھی مزید بڑھیں گے۔ غور کرنے والی بات یہ ہے کہ روہت شرما نے آج وَنڈے کرکٹ میں اپنے 5000 رن بھی مکمل کر لیے ہیں۔

Source: social media