روہت – ریکلٹن کے طوفان میں اڑی کے کے آر، ممبئی انڈیز نے جیت کے ساتھ کیا آئی پی ایل 2026 کا آغاز ‘

ممبئی انڈینز نے آئی پی ایل 2026 میں اپنے سفر کا شاندار آغاز کیا ہے۔ 5 بار کی چیمپئن ٹیم نے سیزن کے اپنے اوپننگ مقابلے میں روہت شرما اور ریان ریکلٹن کی طوفانی نصف سنچریوں کی بدولت کولکاتہ نائٹ رائیڈرز کو چھ وکٹوں سے شکست دی۔ وانکھیڑے اسٹیڈیم میں ٹاس ہارنے کے بعد کے کے آر نے پہلے بیٹنگ کرتے ہوئے 220/4 رنز بنائے تھے۔ 221 رنز کے بڑے ہدف کا پیچھا کرنے اتری ممبئی انڈینز کے اوپنرز نے پہلے وکٹ کے لیے 148 رنز کی شراکت داری کر کے میچ کو یکطرفہ بنا دیا اور ٹیم کی جیت یقینی بنا دی۔ ممبئی نے 5 گیندیں باقی رہتے 224/4 رنز بنا کر جیت درج کی۔ یہ ممبئی کی آئی پی ایل میں سب سے بڑی جیت بھی ہے۔ اس کے ساتھ ہی ممبئی انڈینز نے 13 سال کا داغ بھی مٹا دیا۔ 13 سال بعد ممبئی کو آئی پی ایل کے اپنے اوپننگ میچ میں جیت ملی ہے۔ ممبئی کی ٹیم 2012 کے بعد سے کسی بھی آئی پی ایل سیزن میں اپنا پہلا مقابلہ جیتنے میں کامیاب نہیں ہوئی تھی۔ کے کے آر نے اجنکیا رہانے کی کپتانی اننگز (67) اور انگکرش رگھوونشی (51) کی نصف سنچریوں کی بدولت ممبئی کے سامنے بڑا ہدف رکھا تھا، لیکن روہت اور ریکلٹن نے طوفانی بیٹنگ سے کولکاتہ کو اس مقابلے سے مکمل طور پر باہر کر دیا۔ ممبئی کے اوپنرز نے شروعات سے ہی جارحانہ بیٹنگ کی اور نویں اوور میں ہی بغیر کسی نقصان کے 100 رنز بورڈ پر لگا دیے۔ اس دوران روہت نے 23 گیندوں میں 50 بنائے، جبکہ ریکلٹن نے 24 گیندوں میں نصف سنچری بنائی۔ دونوں بلے باز نصف سنچری مکمل کرنے کے بعد اور زیادہ خطرناک ہو کر کے کے آر کے گیند بازوں کی دھجیاں اڑاتے نظر آئے۔ کے کے آر کو جب تک پہلا بریک تھرو ملا، تب تک مقابلہ ان کے ہاتھ سے نکل چکا تھا۔ ممبئی کے اوپنرز نے پہلی وکٹ کے لیے 148 رنز جوڑے۔ روہت نے اس میچ میں صرف 23 گیندوں میں 50 رنز مکمل کیے، جو آئی پی ایل میں ان کی سب سے تیز نصف سنچری ہے۔ اس سے پہلے انہوں نے 25 گیندوں میں اپنی تیز ترین نصف سنچری بنائی تھی، جو آئی پی ایل 2015 میں چنئی سپر کنگز کے خلاف آئی تھی۔ روہت کی اننگز 78 رنز پر ختم ہوئی۔ انہوں نے 38 گیندوں میں یہ رنز بنائے، جس میں 6 چوکے اور اتنے ہی چھکے شامل تھے۔ روہت نے 200 سے زیادہ کے اسٹرائیک ریٹ سے بیٹنگ کی۔ ریکلٹن بھی مقابلے میں زبردست فارم میں نظر آئے۔ روہت کے آؤٹ ہونے کے بعد ریکلٹن نے شاندار بیٹنگ جاری رکھتے ہوئے ایک اینڈ کو سنبھالے رکھا۔ تاہم، وہ سنچری مکمل نہیں کر سکے۔ ساؤتھ افریقہ کے اس بلے باز نے 43 گیندوں میں 81 رنز بنائے۔ 188 کے اسٹرائیک ریٹ سے ریکلٹن نے چار چوکے اور 8 چھکوں کے ساتھ اپنی اس اننگز کو سجایا۔ ان کے علاوہ سوریہ کمار یادو نے 8 گیندوں میں 16، تلک ورما نے 20 رنز بنائے۔ کپتان ہاردک پانڈیا نے 11 گیندوں میں ناٹ آؤٹ 18 رنز بنائے۔ وننگ رن انہی کے بلے سے آئے۔ نمن دھیر 5 رنز پر ناٹ آؤٹ رہے۔ کے کے آر کے گیند باز اس مقابلے میں مکمل طور پر بے اثر نظر آئے۔

Source: social media