نئی دہلی: جھارکھنڈ کی راجدھانی رانچی میں طلبا کے احتجاج کے دوران پولیس کی جانب سے کئے گئے لاٹھی چارج کوکانگریس لیڈراورلوک سبھا میں اپوزیشن لیڈرراہل گاندھی نے غلط قرار دیا ہے۔ انہوں نے کہا کہ احتجاج کرنے والے طلبا کے خلاف طاقت کا استعمال درست نہیں ہے۔ طلبا کوپُرامن احتجاج کا حق حاصل ہے اورمسائل کا حل بات چیت کے ذریعہ ہی نکالا جا سکتا ہے۔

راہل گاندھی نے اپنی پریس کانفرنس میں کہا کہ جھارکھنڈ حکومت کوطلبا کی بات سننی چاہئے اوران کے مسائل کا فوری حل نکالنا چاہئے۔ انہوں نے کہا کہ پُرامن احتجاج کررہے طلبا کے خلاف تشدد کے ہم مخالف ہیں۔ انہوں نے کہا کہ جھارکھنڈ کے طلبا کے لیے ہمارا پیغام واضح ہے۔ پرامن طریقے سے احتجاج کرنے والے طلبا پرطاقت کا استعمال یا حملہ کرنا غلط ہے اورہم اس کے خلاف ہیں۔

قابل ذکرہے کہ جھارکھنڈ میں کانگریس، جھارکھنڈ مکتی مورچہ (جے ایم ایم)، لیفٹ اورراشٹریہ جنتا دل (آر جے ڈی) کے اتحاد کی حکومت ہے۔ ایسے میں رانچی میں طلبا پرلاٹھی چارج کے بعد بی جے پی نے کانگریس سے سوال کیا تھا کہ وہ اس معاملے پرخاموش کیوں ہے؟ دراصل، راہل گاندھی گزشتہ دنوں دہلی کے جنترمنترپرہوئے احتجاج کے دوران پولیس لاٹھی چارج سے متعلق مرکزی حکومت اوروزیرداخلہ امت شاہ سے جواب طلب کررہے ہیں۔ اسی دوران جھارکھنڈ میں طلبا پرپولیس کارروائی کے بعد بی جے پی نے کانگریس کے موقف پرسوال اٹھائے تھے۔


راہل گاندھی نے آج شام تقریباً 6 بجے پریس کانفرنس کرتے ہوئے کہا کہ ان کا بنیادی سوال اب بھی یہی ہے کہ نوجوانوں پرفائرنگ کی اجازت کس نے دی تھی؟ انہوں نے کہا کہ وزیرداخلہ امت شاہ کویہ بتانا چاہئے کہ کیا انہوں نے اس کارروائی کا حکم دیا تھا یا نہیں۔ انہوں نے کہا کہ اگرامت شاہ کو اس بارے میں معلومات نہیں تھیں تویہ ان کی نااہلی ہے اورانہیں اپنے عہدے پرنہیں رہنا چاہئے۔ انہوں نے کہا، ’’امت شاہ کوپہلے یہ واضح کرنا چاہئے کہ کیا انہوں نے ہی لاٹھی چارج کا حکم دیا تھا، اس کے بعد ہی اس معاملے پربات ہوگی۔‘‘ انہوں نے مزید کہا کہ 15 دن تک نہ وزیرداخلہ امت شاہ اورنہ ہی وزیراعظم نریندرمودی میں اتنی ہمت تھی کہ وہ ایوان میں آکراس معاملے پرجواب دیتے۔ راہل گاندھی نے پریس کانفرنس سے چند منٹ قبل جھارکھنڈ میں طلبا کے خلاف پولیس کارروائی سے متعلق سوشل میڈیا پربھی پوسٹ کیا اورپرامن احتجاج کرنے والے طلبا پرطاقت کے استعمال کی مخالفت کی۔

Source: Admin