پھگواڑہ، 10 مئی :) ہندستان کی سرحدی ریاستوں میں گزشتہ تین دنوں سے پاکستان کی طرف سے مسلسل ڈرون حملوں کے بعد اب پاکستان نے زیادہ ہدف کی صلاحیت والے میزائلوں سے حملے شروع کر دیے ہیں، جن کے دھماکوں سے کئی فٹ لمبے گہرے گڑھے بننے کے ساتھ ساتھ ان کا اثر کئی کلومیٹر تک محسوس کیا جارہا ہے۔ ہفتہ کی صبح پنجاب میں پھگواڑہ کے قریب گاؤں کھلیان میں ایک مشتبہ ڈرون یا میزائل گر کر تباہ ہو گیا، جس سے ایک زبردست دھماکہ اور آگ لگ گئی۔ ابتدائی اطلاعات کے مطابق یہ واقعہ گاؤں کے رہنے والے میجر سنگھ کے کھیت میں صبح تقریباً 2:40 بجے پیش آیا۔ گاؤں کے عینی شاہدین نے بتایا کہ دھماکے سے کچھ دیر قبل دو ڈرون آدم پور کی سمت پرواز کرتے ہوئے دیکھے گئے۔ خیال کیا جاتا ہے کہ ان میں سے ایک ڈرون گاؤں کھلیاں کے کھیتوں میں گرا، جس سے دھماکہ ہوا اور آگ لگ گئی، اس دھماکے سے مقامی لوگوں میں خوف و ہراس پھیل گیا۔ دھماکے سے آٹھ سے دس فٹ گہرا اور بارہ سے پندرہ فٹ چوڑا گڑھا بن گیا۔ گاؤں والوں نے فوری کارروائی کی اور دستیاب وسائل کا استعمال کرتے ہوئے آگ کے مزید پھیلنے سے پہلے ہی اس پر قابو پالیا۔ بعد ازاں فائر بریگیڈ کے عملے نے موقع پر پہنچ کر آگ بجھانے کا کام کیا۔ دھماکے کی شدت کے باوجود جانی یا مالی نقصان کی کوئی اطلاع نہیں ہے۔ پھگواڑہ کے رہائشیوں نے رات کے وقت ایک زوردار دھماکے کی آواز بھی سنی اور آسمان پر ڈرون لائٹس کو دیکھا۔ فضائی سرگرمیوں کے جواب میں احتیاطی اقدام کے طور پر تقریباً 2:15 بجے پھگواڑہ میں بلیک آؤٹ نافذ کر دیا گیا تھا۔ واقعہ کے ایک گھنٹے سے زائد عرصے بعد راولپنڈی تھانے کی مقامی پولیس موقع پر پہنچ گئی۔ پولیس ذرائع نے تصدیق کی کہ مشتبہ ڈرون یا میزائل کی نوعیت اور اصلیت کا پتہ لگانے کے لیے مزید تفتیش جاری ہے۔ علاقے کی نگرانی کی جا رہی ہے اور افسران کسی بھی دیگر واقعات کی نگرانی کر رہے ہیں۔ اس واقعے نے علاقے میں فضائی حدود کی حفاظت اور پرواز کرنے والی اشیاء کے ممکنہ ذرائع کے بارے میں خدشات پیدا کردیئے ہیں۔

Source: uni urdu news service