’پاکستان نے اگر اس طرح کرکٹ کھیلی تو اسپتال میں مریض بڑھ جائیں گے‘

سابق پاکستانی کرکٹر باسط علی نے کہا کہ پاکستان نے اگر اس طرح کرکٹ کھیلی تو اسپتال میں مریضوں کی تعداد بڑھ جائے گی۔ اسپورٹس روم میں گفتگو کرتے ہوئے سابق کرکٹر باسط علی نے کہا کہ فہیم اشرف کا انٹرویو دیکھا جس میں انہوں نے کہا کہ ہم گزشتہ ایک سال سے اسی طرح کی کرکٹ کھیلتے آرہے ہیں اگر ہم نے اس طرح کی کرکٹ کھیلی تو پاکستان کے اسپتالوں میں مریض بہت زیادہ آجائیں گے۔ انہوں نے کہا کہ آپ نیدرلینڈز کے خلاف ہارا ہوا میچ جیتے ہیں، آپ آخری تین اوور میں 33 رنز لے کر جارہے ہیں اور سات وکٹیں گرچکی ہیں، بابر اعظم کے لیے اچھا وقت تھا انہوں نے کیا کیا ہے۔ باسط علی نے کہا کہ میں اسی لیے کہتا ہوں کہ جاوید میانداد اور ظہیر عباس اس لیے گریٹ بنے ہیں کہ وہ آؤٹ نہیں ہوتے تھے۔ سابق کرکٹر نے کہا کہ بابر اعظم آج آسانی سے میچ جتوا سکتے تھے آپ کے سامنے جب بیٹر آؤٹ ہورہے ہیں تو اس طرح کا شاٹ کھیلنے کی ضرورت کیا تھی، میرا خیال ہے کہ یہ میچ پاکستان کی آنکھیں کھولنے کے لیے کافی ہے۔ واضح رہے کہ پاکستان نے ورلڈ کپ کے اپنے پہلے میچ میں نیدرلینڈز کو سنسنی خیز مقابلے کے بعد تین وکٹوں سے شکست دی، فہیم اشرف کو 11 گیندوں پر 29 رنز کی میچ وننگ اننگز کھیلنے پر بہترین کھلاڑی قرار دیا گیا۔ یاد رہے کہ پاکستان ورلڈ کپ میں اپنا دوسرا میچ 10 فروری بروز منگل کو امریکا کے خلاف کھیلے گا۔

Source: social media