پاکستان کی 5 رنز سے جیت رائیگاں، سری لنکا کو شکست دینے کے باوجود سیمی فائنل کی دوڑ سے باہر

پالیکیلے ، 22 فروری : سپر ایٹ مرحلے کے دسویں میچ میں پاکستان نے سنسنی خیز مقابلے کے بعد سری لنکا کو 5 رنز سے شکست دے دی، تاہم مطلوبہ مارجن حاصل نہ کرنے کے باعث پاکستانی ٹیم ٹی ٹوئنٹی ورلڈ کپ سے باہر ہو گئی۔ 213 رنز کے ہدف کے تعاقب میں سری لنکا نے مقررہ اوورز میں 6 وکٹوں کے نقصان پر 207 رنز اسکور بنائے ۔ کپتان داسن شناکا نے 31 گیندوں پر ناقابلِ شکست 76 رنز کی جارحانہ اننگز کھیلی، جبکہ پوون رتھنائیکے نے 58 رنز جوڑے ۔ کامل مشارا 26، چرتھ اسالنکا 25، جنیتھ لیاناگے 5، کمنڈو مینڈس 3 اور پتھم نسانکا 3 رنز بنا کر آ¶ٹ ہوئے ۔ پاکستان کی جانب سے ابرار احمد نے 3 وکٹیں حاصل کیں، جبکہ نسیم شاہ، محمد نواز اور شاہین شاہ آفریدی نے ایک، ایک کھلاڑی کو پویلین کی راہ دکھائی۔ اس سے قبل سری لنکا کی دعوت پر پہلے بیٹنگ کرتے ہوئے پاکستان نے 8 وکٹوں کے نقصان پر 212 رنز اسکور بنائے ۔ صاحبزادہ فرحان نے شاندار سنچری اسکور بناتے ہوئے 100 رنز بنائے جبکہ فخر زمان نے 84 رنز کی دھواں دار باری کھیلی۔ دیگر بیٹرز میں شاداب خان 7، شاہین شاہ آفریدی 4، خواجہ نافع 2، نسیم شاہ 1، محمد نواز 0 اور کپتان آغا سلمان بغیر کوئی رن اسکور بنائے آ¶ٹ ہوئے ۔ سری لنکا کی جانب سے دلشان مدھوشنکا نے 3، داسن شناکا نے 2 جبکہ دُشمانتھا چمیرا نے ایک وکٹ حاصل کی۔ میچ میں فتح کے باوجود پاکستان مطلوبہ رن ریٹ حاصل نہ کر سکا اور یوں ٹورنامنٹ میں اس کا سفر ختم ہوگیا۔

Source: UNI NEWS