ورلڈ کپ : امریکہ نے ایرانی وفد کے 15 ارکان کو ویزے دینے سے انکار کر دیا

تہران، 6 جون:) ایرانی سرکاری میڈیا کے مطابق امریکہ نے فیفا ورلڈ کپ 2026 کے لیے ایران کے 15 رکنی وفد کو ویزے جاری کرنے سے انکار کر دیا ہے ، جبکہ ایرانی فٹبال ٹیم کے کھلاڑیوں اور تکنیکی عملے کو ویزے فراہم کر دیے گئے ہیں۔ برطانوی میڈیا نے ایرانی سرکاری میڈیا کے حوالے سے رپورٹ کیا ہے کہ اگرچہ ایرانی فٹبال ٹیم کے کھلاڑیوں اور ٹیکنیکل اسٹاف کو امریکی ویزے مل چکے ہیں، تاہم ورلڈ کپ کے لیے ٹیم کی انتظامیہ اور منیجمنٹ سے وابستہ متعدد افراد کے ویزوں کے معاملات تاحال حل نہیں ہو سکے اور انہیں ابھی تک امریکا میں داخلے کی اجازت نہیں ملی۔ایرانی میڈیا کے مطابق جن افراد کو ویزے جاری نہیں کیے گئے ، وہ ٹیم کے انتظامی اور سفارتی امور میں اہم کردار رکھتے ہیں۔رپورٹ کے مطابق ایران فٹبال فیڈریشن کے سربراہ مہدی تاج، ٹیم منیجر، میڈیا آفیسر، سکیورٹی حکام اور وزارت خارجہ کے بعض نمائندوں کو امریکی ویزے جاری نہیں کیے گئے ۔ایرانی حکام نے اس معاملے پر تشویش کا اظہار کرتے ہوئے فیفا سے مداخلت کا مطالبہ کیا ہے ۔ واضح رہے کہ گزشتہ روز امریکی حکام نے تصدیق کی تھی کہ ایرانی کھلاڑیوں کو آئندہ ورلڈ کپ میں شرکت کے لیے امریکا آنے کی اجازت دے دی گئی ہے ۔ امریکی حکام کے مطابق ایرانی کھلاڑیوں اور ضروری معاون عملے کو ویزے جاری کر دیے گئے ہیں۔ دوسری جانب ایرانی فٹبال ٹیم ورلڈ کپ 2026 میں شرکت کے لیے میکسیکو روانہ ہو چکی ہے ۔ایرانی ٹیم اپنے گروپ مرحلے کا پہلا میچ 15 جون کو نیوزی لینڈ کے خلاف لاس اینجلس میں کھیلے گی، جبکہ اسی شہر میں اسے بیلجیم کی ٹیم کا بھی سامنا کرنا ہوگا۔

Source: UNI NEWS