ورلڈ فٹ بال کپ شروع ہونے سے چند روز قبل بچھوؤں کا میکسیکو سٹی پر دھاوا

گزشتہ چند دنوں میں میکسیکو کے دارالحکومت میکسیکو سٹی میں بچھو بڑی تعداد میں امڈ آئے ہیں اور سڑکوں اور گھروں میں ان کی موجودگی کی اطلاعات میں اضافہ ہوگیا ہے۔ یہ صورتحال 2026 کے ورلڈ کپ کے افتتاح سے چند دن پہلے سامنے آئی ہے جس کی میزبانی میکسیکو ملک امریکہ اور کینیڈا کے ساتھ مل کر کر رہا ہے۔ میکسیکن اخبار "ریکارڈ" نے اتوار کے روز دارالحکومت میکسیکو سٹی میں بچھوؤں کے دیکھے جانے کی تعداد میں اضافے کا انکشاف کیا۔ اخبار نے کہا کہ بارشوں کی سطح میں اضافے اور ساتھ ہی درجہ حرارت نے بچھوؤں کو گھروں، سڑکوں اور یہاں تک کہ عوامی مقامات پر نکلنے پر مجبور کر دیا ہے۔ اخبار نے ماہرین کے حوالے سے بتایا کہ گرمی اور نمی کا یکجا ہونا بچھوؤں کی سرگرمیوں کو بڑھاتا ہے جن کی قدرتی پناہ گاہوں کو بارشیں ڈبو دیتی ہیں۔ اس کی وجہ سے وہ پناہ لینے کے لیے خشک اور تاریک جگہوں کی تلاش پر مجبور ہو جاتے ہیں۔ اخبار نے بتایا کہ تلالپان، ماگدالینا کونٹریراس، زوچیمیلکو، الوارو اوبریگون، کویوآکان اور میلپا الٹا وہ علاقے ہیں جہاں زہریلے بچھوؤں کی نمایاں موجودگی سب سے زیادہ دیکھی گئی ہے۔ یاد رہے میکسیکو جمعرات کے روز دارالحکومت میکسیکو سٹی کے تاریخی "ایزٹیکا" سٹیڈیم میں میزبان ٹیم اور جنوبی افریقہ کی ٹیم کے درمیان میچ سے 2026 کے ورلڈ کپ کے افتتاحی میچ کی میزبانی کر رہا ہے۔

Source: social media