National

اوڈیشہ:: 1,700 ٹن لوہا لے جانے والا پناما کا جہاز غرقاب ہونے کا خدشہ، کوسٹ گارڈ اور نیوی متحرک

23/08/26

اوڈیشہ کے پارادیپ پورٹ سے چین کے لیے روانہ ہونے والا ایک غیر ملکی مالبردار جہاز ساحل سے تقریباً 200 ناٹیکل میل دور پراسرار طور پر لاپتہ ہو گیا ہے۔ جہاز کا رابطہ منقطع ہونے کے بعد انڈین کوسٹ گارڈ اور انڈین نیوی نے مشترکہ طور پر بڑے پیمانے پر تلاش اور بچاؤ کا آپریشن شروع کر دیا ہے۔
پارادیپ پورٹ اتھارٹی کے ذرائع کے مطابق پناما کا پرچم بردار یہ بحری جہاز 20 اگست کی رات تقریباً 10:30 بجے 1,700 ٹن لوہے کی ایسک (Iron Ore Fines) لے کر چین کے لیے روانہ ہوا تھا۔ ساحل سے تقریباً 200 ناٹیکل میل کے فاصلے پر پہنچنے کے بعد اچانک جہاز کا رابطہ منقطع ہو گیا۔

بعض اطلاعات میں خدشہ ظاہر کیا جا رہا ہے کہ جہاز گہرے سمندر میں غرقاب ہو چکا ہے اور عملے کے ارکان لائف جیکٹس اور لائف بوٹس کے ذریعے سمندر کی لہروں پر تیرتے ہوئے امداد کے منتظر ہیں۔ تاہم، جہاز کا نام، IMO نمبر اور رابطہ منقطع ہونے کی حتمی وجوہات کی سرکاری سطح پر تصدیق ہونا ابھی باقی ہے۔

انڈین کوسٹ گارڈ کے پارادیپ یونٹ کے ڈپٹی انسپکٹر جنرل، سنجے نیگی نے بتایا کہ "انڈمان اور نکوبار یونٹ کی جانب سے ریسکیو آپریشن جاری ہے اور امدادی ٹیمیں جلد موقع پر پہنچ جائیں گی۔"

اس کے علاوہ، آس پاس کے سمندری علاقے میں موجود دیگر تجارتی اور بحری جہازوں کو بھی الرٹ کر دیا گیا ہے تاکہ وہ لاپتہ جہاز کو تلاش کرنے اور عملے کو بچانے میں مدد کر سکیں۔ انتظامیہ کی جانب سے تمام تر وسائل کو بروئے کار لایا جا رہا ہے۔

Source: Admin