نیوزی لینڈ نے ہندستان کو 50 رن سے شکست دے دی

وشاکھا پٹنم، 28 جنوری:) ٹِم سائفرٹ (64)، ڈیون کانوے (44) اور ڈیرل مچل (ناٹ آوٹ 39) کی شاندار بلے بازی کے بعد کپتان مچل سینٹنر (تین وکٹ) کی قیادت میں گیندبازوں کی عمدہ گیندبازی کی بدولت نیوزی لینڈ نے بدھ کے روز چوتھے ٹی-20 مقابلے میں ہندستان کو 50 رن سے ہرا دیا۔ 216 رن کے ہدف کے تعاقب میں اتری ہندستانی ٹیم کی شروعات خراب رہی اور اس نے 9 رن کے اسکور پر دو وکٹ گنوا دیے ۔ ابھیشیک شرما (صفر) اور سوریہ کمار یادو (8) رن بنا کر آوٹ ہوئے ۔ اس کے بعد سنجو سیمسن نے رِنکو سنگھ کے ساتھ تیسرے وکٹ کے لیے 46 رن کی شراکت قائم کی۔ ساتویں اوور میں مچل سینٹنر نے سنجو سیمسن کو 16 گیندوں میں 24 رن پر آوٹ کر کے ہندستان کو تیسرا جھٹکا دیا۔ ہاردک پانڈیا (2) کو بھی سینٹنر نے پویلین بھیجا۔ رِنکو سنگھ 30 گیندوں میں 39 رن بنا کر پانچویں وکٹ کے طور پر آوٹ ہوئے ۔ اس کے بعد شِوَم دوبے نے ہرشِت رانا کے ساتھ چھٹے وکٹ کے لیے 63 رن جوڑ کر امید جگائی، لیکن 15ویں اوور کی آخری گیند پر میٹ ہینری نے شِوَم دوبے کو رن آوٹ کر دیا۔ شِوَم دوبے نے 23 گیندوں میں سات چھکے اور تین چوکے لگا کر 65 رن کی جارحانہ اننگز کھیلی اور ہندستان کی جانب سے تیسری تیز ترین ٹی-20 نصف سنچری مکمل کی۔ اگلے ہی اوور میں ہرشِت رانا 9 رن بنا کر آوٹ ہوئے ۔ ارشدیپ سنگھ (صفر) اور جسپریت بمراہ (4) رن بنا کر آوٹ ہوئے ۔ 19ویں اوور کی چوتھی گیند پر جیکب ڈفی نے کلدیپ یادو (1) کو آوٹ کر کے 165 کے اسکور پر ہندستانی اننگز کا خاتمہ کر دیا اور اپنی ٹیم کو 50 رن سے فتح دلائی۔ نیوزی لینڈ کی جانب سے مچل سینٹنر نے تین وکٹ حاصل کیے ، جبکہ جیکب ڈفی اور ایش سوڈھی کو دو دو وکٹ ملے ۔ میٹ ہینری اور زیکری فوکس نے ایک ایک بلے باز کو آوٹ کیا۔ اس سے قبل ہندستان نے ٹاس جیت کر پہلے گیندبازی کا فیصلہ کیا تھا۔ نیوزی لینڈ کی بلے بازی میں ٹِم سائفرٹ اور ڈیون کانوے کی اوپننگ جوڑی نے پہلے وکٹ کے لیے 100 رن جوڑے ۔ نویں اوور میں کلدیپ یادو نے ڈیون کانوے کو آوٹ کر کے اس شراکت کو توڑا۔ کانوے نے 23 گیندوں میں چار چوکے اور تین چھکے لگا کر 44 رن بنائے ۔ اگلے اوور میں جسپریت بمراہ نے رچن رویندرا (2) کو اپنی ہی گیند پر کیچ آوٹ کیا۔ 13ویں اوور میں ارشدیپ سنگھ نے ٹِم سائفرٹ کو آوٹ کر کے رفتار کم کی؛ سائفرٹ نے 36 گیندوں میں سات چوکے اور تین چھکے لگا کر 62 رن بنائے ۔ بعد ازاں کلدیپ نے گلین فلپس (24) کو آوٹ کیا، مارک چیپمین (9) کو روی بشنوئی نے پویلین بھیجا۔ مچل سینٹنر (11) اور زیکری فوکس 13 رن بنا کر آوٹ ہوئے ۔ نیوزی لینڈ نے مقررہ 20 اوور میں سات وکٹ کے نقصان پر 215 رن بنائے ۔ ڈیرل مچل نے 18 گیندوں میں دو چوکے اور تین چھکے لگا کر ناٹ آوٹ 39 رن بنائے ۔ ہندستان کی جانب سے گیندبازی میں کلدیپ یادو اور ارشدیپ سنگھ نے دو دو وکٹ حاصل کیں، جبکہ جسپریت بمراہ اور روی بشنوئی نے ایک ایک بلے باز کو آوٹ کیا۔

Source: UNI NEWS