نورا فتحی کا فیفا ورلڈکپ کیلئے نیا گانا ریلیز

مراکشی نژاد بالی ووڈ ڈانسر، اداکارہ و گلوکارہ نورا فتحی نے فیفا ورلڈ کپ 2026ء کے لیے آفیشل میوزک پروجیکٹ کے تحت ریکارڈ کیا گیا اپنا نیا گانا ’سیئر سیئر‘ ریلیز کر دیا۔ یہ گانا ٹورنامنٹ کے آفیشل البم میں شامل ہے، جو کہ دنیا کے مختلف مملک سے تعلق رکھنے والے فنکاروں کو ایک جگہ اکٹھا کرتا ہے۔ ’سیئر سیئر‘ کو میوزک پروڈیوسر سنجوئے اور فرانسیسی گلوکار ویجیڈریم کے ساتھ مل کر ریکارڈ کیا گیا ہے۔ اس سے قبل میڈیا پر یہ خبریں گردش کر رہی تھیں کہ نورا فتحی فیفا ورلڈ کپ 2026ء میں پرفارم کریں گی۔ فیفا ورلڈ کپ کی افتتاحی تقریب 12 جون 2026ء کو کینیڈا کے شہر ٹورنٹو میں BMO فیلڈ میں منعقد ہو گی۔ یاد رہے کہ نورا فتحی نے قطر میں ہونے والے گزشتہ فیفا ورلڈ کپ کی افتتاحی تقریب میں بھی پرفارم کیا تھا۔ گلوکارہ نے اپنے نئے گانے کے بارے میں بات کرتے ہوئے کہا کہ یہ گانا میرے لیے بہت خاص ہے، کیونکہ اسے مختلف ثقافتی اثرات کے مرکب کے طور پر تصور کیا گیا تھا۔ اُنہوں نے کہا کہ میں ایسا گانا چاہتی تھی جو میری شخصیت کے ہر پہلو کی عکاسی کرتا ہو، جیسے کہ میرا مراکش سے تعلق ہے، میں کینیڈا میں پیدا ہوئی، وہیں پرورش پائی اور کام کے سلسلے میں بھارت میں رہنے کی وجہ سے بھارتی کمیونٹی کا بھی میری زندگی پر گہرا اثر ہے۔

Source: social media