سری بھومی (اسام):
اسام کے ضلع سری بھومی میں دو روز سے پراسرار طور پر لاپتہ 52 سالہ بی جے پی رہنما کی تشدد شدہ لاش ملنے سے علاقے میں شدید سنسنی پھیل گئی۔ پولیس نے اسے باضابطہ طور پر قتل کا معاملہ قرار دیتے ہوئے 6 افراد کو گرفتار کر لیا ہے، جبکہ کارروائی کے دوران ایک ملزم پولیس مقابلے میں زخمی بھی ہوا ہے۔

مقتول کی شناخت 52 سالہ بکاش دھر کے طور پر ہوئی ہے، جو باظاری چھیڑا پولیس اسٹیشن کے تحت آنے والے گاؤں چھاگل مووا کے رہائشی تھے۔ جمعہ کی صبح ریاستِ تریپورہ کی سرحد کے قریب یوگی چھیڑا علاقے میں واقع ایک ویران مکان سے ان کی لاش برآمد ہوئی۔

بکاش دھر کے اہل خانہ نے ان کی گمشدگی کی رپورٹ 12 اگست کو درج کرائی تھی۔ مقتول کے بیٹے مدن دھر نے صحافیوں کو بتایا:

"12 اگست کو دوپہر تقریباً 1 بجے میرے والد کو ایک فون کال آئی، جس کے فوراً بعد وہ گھر سے نکل گئے۔ پوچھنے پر انہوں نے بتایا کہ انہیں ایک ہنگامی میٹنگ میں جانا ہے۔ کئی گھنٹے گزرنے کے بعد جب میرے چچا نے ان کے نمبر پر رابطہ کرنے کی کوشش کی تو ان کا فون بند آرہا تھا۔ رات 10 بجے تک واپسی نہ ہونے پر ہم نے تلاش شروع کی اور پولیس میں شکایت درج کرائی۔"

معاملے کی تفصیلات بتاتے ہوئے سری بھومی کی سپرنٹنڈنٹ آف پولیس (ایس پی) لینا ڈولے نے کہا:

"ہمیں 12 اگست سے بکاش دھر کی گمشدگی کی شکایت موصول ہوئی تھی۔ ہم نے ایڈیشنل ایس پی (کرائم) کی قیادت میں فوری تحقیقات شروع کیں، جنہوں نے مقتول کے گھر جا کر تمام ضروری معلومات حاصل کیں۔"

ایس پی نے مزید بتایا کہ پولیس نے کارروائی کرتے ہوئے ۵ ملزمان کو گرفتار کر لیا ہے، جن کی شناخت عبدالسلام، صفت علی، عبدالاحد، سیف العلی اور بدرالحق کے طور پر ہوئی ہے۔

تحقیقات کے دوران مرکزی ملزم عبدالسلام نے اعتراف کیا کہ ان کی بکاش دھر کے ساتھ ذاتی دشمنی تھی۔ انہوں نے بی جے پی رہنما کو قتل کرنے کے بعد لاش کو ایک پانی کے ذخیرے کے قریب پھینک دیا تھا۔ ان ملزمان کی نشاندہی پر ایک اور شخص سونام میاں کا نام بھی سامنے آیا ہے جو واقعے کی رات ہی تریپورہ فرار ہو گیا تھا۔

ایس پی لینا ڈولے کا کہنا تھا کہ مقتول کے جسم پر چوٹوں اور تیز دھار ہتھیاروں کے گہرے نشانات پائے گئے ہیں، جس سے یہ صاف ظاہر ہوتا ہے کہ یہ بے رحمانہ قتل کا معاملہ ہے۔

پولیس کارروائی کے دوران ایک ملزم نے فرار ہونے کی کوشش بھی کی۔ ایس پی نے بتایا:

"قاتلانہ حملے میں استعمال ہونے والے ہتھیار کی برآمدگی کے دوران ملزم بدرالحق نے پولیس حراست سے بھاگنے کی کوشش کی۔ اس دوران ہونے والے مقابلے میں ہمارا ایک کانسٹیبل زخمی ہو گیا۔ پولیس نے صورتحال پر قابو پانے اور ملزم کو روکے رکھنے کے لیے اس کی ٹانگ پر گولی ماری۔"

پولیس کے مطابق مقدمہ درج کر کے مزید تحقیقات جاری ہیں اور فرار ملزم کی گرفتاری کے لیے چھاپے مارے جا رہے ہیں۔

Source: Admin