Sports

محمدن اسپورٹنگ کلب کا شاندار سفر جاری: کلکتہ پولس کلب کو 2-0 سے ہرا کر ناقابلِ شکست ریکارڈ برقرار رکھا

08/08/26

باراسات، 8 اگست : محمدن اسپورٹنگ کلب نے باراسات اسٹیڈیم میں کھیلے گئے کلکفتہ فٹبال لیگ (CFL) کے اپنے چھٹے مقابلے میں کلکتہ پولس کلب کو 2-0 سے شکست دے کر اپنے ناقابلِ شکست سلسلے کو برقرار رکھا ہے۔

میچ کے آغاز سے ہی محمدن اسپورٹنگ کی ٹیم نے جارحانہ کھیل کا مظاہرہ کیا، لگاتار مواقع پیدا کیے اور حریف کے دفاعی خطے پر مسلسل دباؤ برقرار رکھا۔ اس محنت کا پھل اس وقت ملا جب فردین علی ملا نے شاندار گول کر کے ٹیم کو ابتدائی برتری دلا دی۔ پہلا ہاف ختم ہونے تک اسکور محمدن اسپورٹنگ کے حق میں 1-0 رہا۔

دوسرے ہاف میں بھی کھلاڑیوں نے اپنے حملہ آور انداز کو جاری رکھا اور حریف کے گول ایریا میں تیز رفتاری کا مظاہرہ کرتے ہوئے مزید گول کے لیے مسلسل کوششیں کیں۔ بالآخر لالتھنکیما نے حریف گول کیپر کو چکمہ دیتے ہوئے انتہائی مہارت اور سکون کے ساتھ بال کو جال میں داخل کر کے برتری کو 2-0 کر دیا۔

میچ کے اختتام تک مزید کوئی گول نہ ہو سکا اور محمدن اسپورٹنگ کلب نے 2-0 سے فتح اپنے نام کر کے اہم پوائنٹس حاصل کیے اور ٹورنامنٹ میں اپنا ناقابلِ تسخیر سفر جاری رکھا۔

Source: Admin