ہمالیہ جیسا ہدف اور سی ایس کے کا جوابی وار،لکھنو کوشکست،پانچویں پوزیشن حاصل کر لی

چنئی، 10 مئی :چنئی سپر کنگز نے اتوار کے روز کھیلے گئے سنسنی خیز مقابلے میں لکھنو سپر جائنٹس کو 5 وکٹوں سے شکست دے کر ایونٹ میں اپنی پوزیشن مستحکم کر لی ہے ۔ 204 رنز کے بڑے ہدف کا تعاقب کرتے ہوئے چنئی نے 19.2 اوورز میں کامیابی حاصل کی۔ سنجو سیمسن (28 رنز، 14 گیندیں) اور کپتان رتاراج گائیکواڑ نے پہلی وکٹ کے لیے 45 رنز جوڑ کر جیت کی بنیاد رکھی۔ سیمسن کے آوٹ ہونے کے بعد آنے والے ارویل پٹیل نے میچ کا نقشہ بدل دیا۔ انہوں نے محض 23 گیندوں پر 65 رنز کی برق رفتار اننگز کھیلی، جس میں 8 فلک بوس چھکے شامل تھے ۔ رتاراج گائیکواڑ نے 42 رنز بنا کر اننگز کو استحکام فراہم کیا۔ آخری لمحات میں جب میچ نازک موڑ پر تھا، شیوم دوبے (15 ناٹ آوٹ) اور پرشانت ویر (17 ناٹ آوٹ) نے 39 رنز کی ناقابلِ شکست شراکت داری قائم کر کے 4 گیندیں پہلے ہی ٹیم کو فتح دلا دی۔شہباز احمد اور دگوش راٹھی نے 2، 2 کھلاڑیوں کو آوٹ کیا، جبکہ اویش خان کے حصے میں ایک وکٹ آئی۔ اس سے قبل، لکھنو سپر جائنٹس نے پہلے بیٹنگ کرتے ہوئے 8 وکٹوں پر 203 رنز بنائے تھے ۔ جوش انگلس نے محض 17 گیندوں پر نصف سنچری مکمل کی، جو لکھنو¶ کے لیے تیسری تیز ترین ففٹی ہے ۔ انہوں نے مجموعی طور پر 85 رنز (33 گیندیں، 10 چوکے ، 6 چھکے ) بنائے ۔ شہباز احمد نے 43 رنز کی ناقابلِ شکست اننگز کھیل کر مجموعہ 200 کے پار پہنچایا۔ جیمی اوورٹن سب سے کامیاب بالر رہے جنہوں نے 3 اہم وکٹیں حاصل کیں۔ انشول کمبوج کو 2 اور نور احمد کو 1 وکٹ ملی۔اس فتح کے ساتھ چنئی سپر کنگز اب پوائنٹس ٹیبل پر پانچویں نمبر پر پہنچ گئی ہے ، جس سے ان کے پلے آف میں پہنچنے کے امکانات مزید روشن ہو گئے ہیں۔

Source: UNI NEWS