ہم پر نئے امریکی حملے کا امکان اب بھی موجود ہے :ایران

ایران نے امریکہ پر ایک بار پھر تنقید کی ہے، خاص طور پر اس فوجی حملے پر جو جون میں اس کی سرزمین پر کیا گیا تھا۔ ایرانی وزارتِ خارجہ کے ترجمان اسماعیل بقائی نے کہا ہے کہ "امریکی عسکری حملے کا امکان بدستور موجود ہے اور یہ کسی بھی وقت ہو سکتا ہے۔" اپنی ہفتہ وار پریس کانفرنس میں بقائی نے کہا کہ "آئندہ کسی بھی مذاکرات میں ہمیں اپنے سابقہ تجربات کو پیشِ نظر رکھنا چاہیے۔" انھوں نے مزید کہا کہ "امریکہ کی ایران کے خلاف بین الاقوامی قانون کی خلاف ورزیوں کی کئی مثالیں موجود ہیں۔ وہ ہمیشہ کہتے آئے ہیں کہ تمام آپشن میز پر ہیں، اس لیے ہمیں ہر وقت تیار رہنا چاہیے۔" انھوں نے زور دے کر کہا کہ "امریکی فریق کے ساتھ آئندہ مذاکرات میں ان سابقہ تجربات کو لازمی طور پر مد نظر رکھنا چاہیے۔" بین الاقوامی ایٹمی توانائی ایجنسی (آئی اے ای اے) سے متعلق سوال پر ترجمان نے وضاحت کی کہ تہران "ایٹمی ہتھیاروں کے عدم پھیلاؤ کے معاہدے" NPT کے تحت تعاون جاری رکھے گا، اور یہ تعاون ایرانی پارلیمان کے فیصلے کے مطابق ہو گا۔"

Source: social media