لیونل میسی کا ڈیڑھ کروڑ ڈالر کا جدید پرتعیش طیارہ توجہ کا مرکز بن گیا

اسٹار فٹبالر لیونل میسی کے دورہ بھارت میں ان کا پرتعیش جیٹ سب کی توجہ کا مرکز بنا رہا، جو دنیا کے مہنگے اور جدید طیاروں میں شامل ہے۔ رپورٹ کے مطابق لیونل میسی کا یہ نجی طیارہ گلف اسٹریم ہے، جو دنیا کے مہنگے اور جدید طیاروں میں شمار ہوتا ہے۔ میسی نے یہ طیارہ 2018 میں 15 ملین ڈالر میں خریدا تھا، طیارے پر میسی کا ذاتی رنگ نمایاں ہے، اس کی دم پر ان کی مشہور جرسی نمبر 10 درج ہے، جبکہ طیارے کی سیڑھیوں پر ان کی اہلیہ انتونیلا روکوزو اور بچوں تیاگو، ماتیو اور سیرو کے ناموں کے ابتدائی حروف کندہ ہیں۔ نجی جیٹ کے اندر 14 آرام دہ ریکلائننگ سیٹس، ایک جدید کچن، 2 باتھ رومز اور دیگر سہولیات موجود ہیں، جو میسی اور ان کے اہلِ خانہ اور ٹیم کو سفر کے دوران مکمل آرام فراہم کرتی ہیں۔ یہ طیارہ 51 ہزار فٹ کی بلندی تک پرواز کی صلاحیت رکھتا ہے اور بغیر رکے نیویارک سے ٹوکیو یا لندن سے سنگاپور تک سفر کر سکتا ہے۔ قابلِ ذکر بات یہ ہے کہ میسی اس سے قبل بھی ایمبرائر لیگیسی 650 کے مالک رہ چکے ہیں، جس کی قیمت تقریباً 35 ملین ڈالر بتائی جاتی ہے۔ خیال رہے کہ عالمی شہرت یافتہ فٹ بال اسٹار لیونل میسی 13 دسمبر 2025ء کو کولکتہ پہنچے، جہاں ان کے گوٹ انڈیا ٹور کا باضابطہ آغاز ہوا۔ کولکتہ ایئر پورٹ پر شائقین کا جمِ غفیر امڈ آیا، لوگ اپنے پسندیدہ فٹبالر کی ایک جھلک دیکھنے کے لیے طویل قطاروں میں کھڑے نظر آئے۔

Source: social media