لبنان پر اسرائیل بمباری قابل مذمت، تل ابیب گولان کی پہاڑیوں سے دستبردار ہو: پیرس

فرانس نے جنوبی لبنان پر اسرائیلی حملوں میں شدت پر تشویش کا اظہار کرتے ہوئے اسرائیلی فوج سے شام کی خودمختاری اور علاقائی سالمیت کا احترام کرنے کا مطالبہ کیا ہے۔ فرانس کی وزارت خارجہ کے ترجمان پاسکل کونفارو نے کہا کہ ان کا ملک اسرائیلی فوج سے گولان کی پہاڑیوں سے پیچھے ہٹنے اور شام کی علاقائی سالمیت کا احترام کرنے کا مطالبہ کرتا ہے۔ انہوں نے جنوبی لبنان پر اسرائیلی حملوں کی شدت پر اپنے ملک کی تشویش کا بھی اظہار کیا۔ ترجمان نے کہا کہ ہمیں جنوبی لبنان میں اسرائیلی حملوں کی شدت پر تشویش ہے اور ہم اسرائیلی حملوں کی مذمت کرتے ہیں جن میں عام شہری مارے جاتے ہیں۔ پاسکل کونفارو نے مزید زور دیا کہ 27 نومبر 2014 کو طے پانے والے جنگ بندی معاہدے کی حمایت میں فرانس کا موقف واضح ہے اور اس کے احترام کی ضرورت ہے۔ اسرائیلی فوج نے بدھ کے روز جنوبی لبنان پر اپنے فضائی حملے تیز کر دیے ہیں۔ روزانہ حملوں کی مہم کے ایک حصے کے طور پر نئے حملے میں کم از کم ایک شخص کو قتل کردیا گیا ہے۔ اسرائیل کا دعویٰ ہے کہ اس کے حملوں کا مقصد حزب اللہ کو سرحدی علاقے میں اپنی فوجی صلاحیتوں کو دوبارہ تعمیر کرنے سے روکنا ہے۔ اسرائیلی افواج اب بھی لبنانی حدود کے اندر پانچ سے زیادہ مقامات پر تعینات ہیں۔ شام میں بھی اسرائیلی افواج نے جنوب میں بفر زون میں پیش قدمی کی ہے اور گولان کی پہاڑیوں کو الگ کرنے والے اقوام متحدہ کے زیر نگرانی علاقے کے مشرق میں پوزیشنوں پر قبضہ کر لیا ہے۔ 8 دسمبر 2024 سے پچھلی حکومت کے خاتمے کے بعد اسرائیل نے شام کے اندر کئی فوجی مقامات پر اپنے فضائی حملے تیز کر دیے ہیں۔ اسرائیلی وزیر اعظم بنیامین نیتن یاہو نے بدھ کو جنوبی شام میں تعینات اسرائیلی افواج کا دورہ کیا جس پر دمشق میں حکومت کی طرف سے شدید مذمت کی گئی اور اس دورے کو اپنی خودمختاری کی خلاف ورزی قرار دیا گیا۔

Source: social media