کرسٹیانو رونالڈو کے شاندار گول، النصر نے سعودی پرو لیگ کا ٹائٹل جیت لیا

ریاض(22 مئی ): پرتگال کے مایہ ناز فٹبالر کرسٹیانو رونالڈو کے دو شاندار گولز کی بدولت النصر نے ‘ڈیمک ایف سی’ کو ایک کے مقابلے میں چار گول سے شکست دے کر سعودی پرو لیگ کا ٹائٹل اپنے نام کر لیا ہے۔ الاول پارک اسٹیڈیم میں کھیلے گئے فائنل میچ میں فتح کے بعد النصر نے مجموعی طور پر گیارہویں بار سعودی پرو لیگ کی ٹرافی اٹھائی ہے۔ لیگ کے سنسنی خیز اختتام پر النصر نے اپنے روایتی حریف ‘الہلال’ پر دو پوائنٹس کی برتری حاصل کر کے چیمپئن بننے کا اعزاز پایا۔ اس سے قبل النصر کے پاس پچھلے ہفتے ہی ٹائٹل جیتنے کا موقع تھا، تاہم برازیلین گول کیپر بینٹو کی آخری منٹوں میں کی گئی ایک غلطی کی وجہ سے الہلال نے میچ ایک ایک سے ڈرا کر دیا تھا۔ جبکہ النصر کو اے ایف سی چیمپئنز لیگ ٹو کے فائنل میں جاپان کے کلب گامبا اوساکا کے ہاتھوں ہوم گراؤنڈ پر غیر متوقع شکست کا سامنا بھی کرنا پڑا تھا۔ تاہم کنگ سعود یونیورسٹی اسٹیڈیم میں مینیجر جارج جیسس کی ٹیم نے شاندار انداز میں کم بیک کیا۔ میچ کے پہلے ہاف کے اختتام سے کچھ دیر قبل لیورپول کے سابق ونگر ساڈیو مانے نے پہلا گول کر کے النصر کو برتری دلائی، جس کے بعد دوسرے ہاف کے آغاز میں ہی کنگسلے کومن نے اس برتری کو دگنا کر دیا۔ اس کے بعد کرسٹیانو رونالڈو میچ پر چھا گئے اور یکے بعد دیگرے دو شاندار گول داغ کر النصر کی فتح اور ٹائٹل پر مہر ثبت کر دی۔ ان دو گولز کے ساتھ ہی رونالڈو کے اس سیزن میں لیگ گولز کی تعداد 28 ہو گئی ہے، جبکہ وہ سعودی عرب میں النصر کی جانب سے اب تک تین سیزنز میں 100 سے زائد گولز اسکور کر چکے ہیں۔ واضح رہے کہ جنوری 2023 میں النصر کلب جوائن کرنے کے بعد سے رونالڈو کا النصر کے ساتھ یہ پہلا لیگ ٹائٹل ہے۔

Source: social media