سلی گوڑی، 6 ستمبر: مغربی بنگال کے منگن ضلع انتظامیہ نے اتوار کو کہا کہ تیستا اور چیاکونگ ندیوں کے سنگم کے قریب لینڈ سلائیڈنگ کے بعد تیستا ندی میں اچانک پانی کی سطح بڑھنے کا خطرہ اب کافی کم ہوگیا ہے ۔
آج دن میں 'تھینگ ٹنل' کے سامنے واقع علاقے کے قریب لینڈ سلائیڈنگ کے واقعے کے بعد صورتِ حال کا جائزہ لینے کے لیے ایک مشترکہ معائنہ ٹیم نے دوپہر کے وقت جائے وقوعہ کا دورہ کرکے حالات کا جائزہ لیا۔
ٹیم میں جوائنٹ ڈائریکٹر-کم-ڈی پی او، ڈی ڈی ایم اے منگن، ایس ڈی پی او چونگ تھانگ اور ضلعی ڈیزاسٹر مینجمنٹ اتھارٹی (ڈی ڈی ایم اے ) اور چونگ تھانگ پولیس کے افسران شامل تھے ۔
انتظامیہ کے مطابق، ملبہ، جس کی وجہ سے ندی کے قدرتی بہا¶ میں جزوی رکاوٹ پیدا ہوئی تھی، اب مزید کھسک گیا ہے ، جس کے نتیجے میں پانی کا بہا¶ مستحکم اور معمول پر آرہا ہے ۔ اس کے باعث جمع شدہ پانی کے اچانک خارج ہونے یا ندی کے زیریں حصے میں پانی کے اچانک تیز بہا¶ کا خطرہ بھی کافی کم ہوگیا ہے ۔
ندی کے متاثرہ حصے میں مجموعی طور پر صورتِ حال مستحکم بتائی گئی ہے ۔ ندی کی سطح آب اور ڈھلوان کی مضبوطی پر مسلسل نظر رکھنے کے لیے موقع پر پولیس اور ڈی ڈی ایم اے کے اہلکار تعینات کیے گئے ہیں۔
تاہم، انتظامیہ نے تیستا ندی کے زیریں علاقوں میں رہنے والے لوگوں کو چوکس رہنے ، ندی کے کنارے نہ جانے اور احتیاطی طور پر صفائی کا کام مکمل ہونے تک رضاکارانہ طور پر محفوظ اور اونچی جگہوں پر منتقل ہونے کا مشورہ دیا ہے ۔